نئی دہلی۔ اجنکیا رہانے آسٹریلیائی ٹسٹ سیریز کے لئے ہندوستان کی نظر ثانی ٹیم میں نائب کپتان کی حیثیت سے برقرار ہیں لیکن عرفان پٹھان کو لگتا ہے کہ ویراٹ کوہلی کی غیر موجودگی میں زیادہ تجربہ کار روہت شرما کو ٹیم کی قیادت کرنی چاہئے کیونکہ کوہلی سیریز کے ابتدائی میچ میں کھیلنے کے بعد دستیاب نہیں ہوں گے ۔
پہلے ٹسٹ کے بعد کوہلی کو رخصت دے دی گئی ہے اور پٹھان نے کہا کہ اس سے اس ٹیم پر بہت اثر پڑے گا جس نے دو سیزن قبل ان کی زیرقیادت تاریخی سیریز جیت حاصل کی تھی۔ پٹھان نے کہا کہ کوہلی کی عدم موجودگی کا ٹیم پر بڑا اثر پڑے گا لیکن آپ کو ان کے فیصلے کا احترام کرنا چاہئے ۔ ہمیں کرکٹ سے باہرکی زندگی کو قبول کرنا چاہئے خاندان بہت ضروری ہے ۔
انہوں نے کہا کہ یہ یقینی طور پر میدان میں بہت بڑا فرق پیدا کرے گا اور کسی کے لئے بھی ان کی جگہ لینا بہت مشکل ہوگا۔ پٹھان کی ذاتی رائے ہے کہ کوہلی کی عدم موجودگی میں روہت کو ٹیم کی کپتانی کرنی چاہئے حالانکہ رہانے اس وقت نائب کپتان ہیں۔
ممبئی انڈینزکی قیادت کرنے والے روہت نے ٹیم کو انڈین پریمیر لیگ کے کئی اعزاز اپنے نام کیے ہیں اور ندہاس ٹرافی اور ایشیائکپ میں ہندوستان کو دوبڑی ٹرافیز بھی دلائی ہیں۔ انہوں نے کہا کہ رہانے کے ساتھ ایسا کچھ نہیں ہے لیکن روہت کو کپتانی کرنی چاہئے ۔ وہ ایک عظیم کپتان ہیں اور وہ یہ ثابت کر چکے ہیں اور ان کے پاس ضروری تجربہ بھی ہے ۔
پٹھان نے کہا کہ اوپنرکی حیثیت سے روہت کا کردار بھی اہم ہوگا۔ روہت ایسا کھلاڑی ہے جسے آپ آسٹریلیا میں کھلانا چاہتے ہیں۔ مجھے یاد ہے کہ وہ 2008 میں ونڈے سیریز میں نئے تھے لیکن روہت نے آسٹریلیائی پچوں پر بہت عمدہ کارکردگی کا مظاہرہ کیا تھا۔ وہ زخموں سے صحت یابی کے بعد شاندارکارکردگی کا مظاہرہ کرنے کے لئے بے چین ہوں گے ۔
پٹھان نے کہا کہ روہت شرما سے زیادہ کوئی بھی خطرناک نہیں ہوگا جو حریف ٹیم کے لئے رنز بنانے کی بھوک رکھتا ہو۔ بیرونی سرزمین پر کھیلنا ہمیشہ ایک مشکل چیلنج ہوتا ہے لیکن جب روہت فارم میں ہوتے ہیں تو حالات سے کوئی فرق نہیں پڑتا ہے ۔انہوں نے کہا کہ ایک اوپنر کی حیثیت سے وہ وہی کردار ادا کرسکتے ہیں جو سہواگ نے 2004 کی سیریز میں کیا تھا اور آپ میچ جیت سکتے ہیں۔
پٹھان نے کہا کہ چیتیشور پجارا کا کردار تیسرے نمبر پر زیادہ اہم ہوجاتا ہے کیونکہ وہ سب کو جوڑنے میں اہم ہوں گے ۔ کوہلی کی غیر موجودگی میں رہانے میرے لئے چوتھے نمبر پر رہیں گے ۔ پجارا پچھلی سیریز میں آسٹریلیا میں مین آف دی سیریز تھے ۔
