کویت سٹی: کویت نے کورونا کی وجہ سے عائد سفری پابندیاں ہٹا دی ہے تاہم ہندوستان سمیت سات ممالک کے لیے یہ پابندیاں برقرار رہے گی۔کورونا کے سبب کویت نے رواں سال مارچ میں کویت سے جانے اور آنے والی بین الاقوامی پروازیں معطل کی تھی۔ تاہم اب یہ پابندیاں ہٹا دی گئی ہے اور یکم اگست سے کویت کے لیے اور کویت سے بین الاقوامی پروازیں بحال ہو جائیں گی۔تاہم پاکستان، بنگلہ دیش، ہندوستان، فلپائن، سری لنکا اور نیپال کے لیے اور وہاں سے آنے والی پروزوں پر پابندی برقرار رہے گی۔
کویت ٹائمز کے مطابق دی سینٹر فار گورنمنٹ کمیونکیشن کے ایک اعلامیے میں کہا گیا ہے کہ سات ممالک کے علاوہ تمام ممالک کے شہریوں اور رہائشیوں کو کویت آنے اور جانے کی اجازت دی گئی ہے۔کویت نے مارچ میں تمام بین الاقوامی پروازیں کورونا کی وجہ سے معطل کردی تھی۔تاہم مختلف ممالک میں پھنسے ہوئے کویت کے شہریوں کو واپس لانے کے لیے خصوصی پروزوں کی اجازت دی گئی تھی۔
مئی کے آخر میں کویت کے سول ایوی ایشن کے حکام نے اعلان کیا تھا کہ حکومت کی اجازت سے کمرشل فلائیٹس کی بحالی کا عمل تین مراحل میں انجام دیا جائے گا۔خیال رہے کویت میں اب تک کورونا وائرس کے 65 ہزار 903 معاملات سامنے آئے ہیں جب کہ اب تک 444 افراد اس وبا کی وجہ سے ہلاک ہو چکے ہیں۔اب تک وبا میں مبتلا ہوکر صحت یاب ہونے والے افراد کی تعداد 56 ہزار467 ہے۔
