ماسکو۔عام طور پر ورچوئل ریئلٹی (وی آر) ہیڈ سیٹ کو انسانوں ذہنی تناؤ ( ڈپریشن ) کو کم کرنے کے لیے مددگار سمجھا جاتا ہے، تاہم روس میں اس ٹیکنالوجی کا استعمال کرتے ہوئے جانوروں کو بھی ذہنی تناؤ سے بچانے کا کام کیا جا رہا ہے۔روسی حکومت نے ایک ایسے منصوبے کا آغاز کیا ہے جس کے ذریعے گائے کو ذہنی تناؤ سے بچانے سمیت اس کے دودھ کی پیداوار بھی بڑھائی جا سکے گی۔روس کی وزارت زراعت و خوراک کی جانب سے ملک بھر کی گائے کو ذہنی تناؤ سے بچانے کے لیے درالحکومت ماسکو کے قریب ایک فام میں ایک نئے تجرباتی منصوبے کا آغاز کیا گیا ہے جس کے ابتدائی نتائج توقعات سے زیادہ بہتر نکلے ہیں۔
وزارت زراعت و خوراک کی جانب سے جاری بیان میں کہاگیا کہ ماسکو کے قریب رس ملوکو فام میں’گائے کو ذہنی تناؤ سے بچانے کے لیے وی آر ہیڈ سیٹ پہنائے جانے کے توقعات سے زیادہ فوائد حاصل ہوئے ہیں اور ان کے دودھ کی پیداوار بہتر ہوئی ہے۔
بیان کے مطابق وی آر ہیڈ سیٹ میں گائے کو خیالی ہریالی اور انتہائی خوشگوار نظارے دکھائے جاتے ہیں اور وہ خیال کرتی ہیں کہ وہ اپنے پسندیدہ ماحول میں چر رہی ہیں۔بیان میں بتایا گیا کہ وی آر ہیڈ سیٹ کے ذریعے گائے کو خیالی چراگاہیں دیکھنے کو ملتی ہیں جس وجہ سے ان کے دودھ کی پیدوار پہلے سے بہتر ہوئی ہے۔دعویٰ کیا گیا کہ تجرباتی پروگرام کے نتائج انتہائی اچھے رہے ہیں اور مذکورہ منصوبے کو ملک کے دیگر علاقوں تک وسعت دی جائے گی ۔
خیال کیا جا رہا ہے کہ اگر روسی ماہرین کا یہ منصوبہ کامیاب ہو گیا تو دنیا بھراور خاص طور پر یورپی ممالک میں اس منصوبے کو استعمال کرکے گائے کے دودھ کی پیداوار بڑھائی جائے گی۔روس کے علاوہ یورپ میں جرمنی، نیدرلینڈ، سوئٹزرلینڈ اور فرانس میں بھی گائے کی بہت بڑی تعداد موجود ہے۔دنیا میں سب سے زیادہ گائے برازیل میں پائی جاتی ہیں جہاں دنیا بھر میں موجود گایوں کا 14 فیصد حصہ پایا جاتا ہے، اس کے بعد ترتیب وار چین، ہندوستان، امریکہ، ایتھوپیا، ارجنٹینا، سوڈان اور پاکستان میں گائے کی تعداد زیادہ ہے۔عام طور پر ہندوستان سمیت دیگر ممالک میں گائے کے دودھ کی پیداوار بڑھانے کے لیے انجکشن کا استعمال کیا جاتا ہے، تاہم اب روسی ماہرین اس کام کے لیے گائے کو ورچوئل ریلٹی کے ذریعے دھوکا دے کر ان کے دودھ کی پیداوار بڑھا رہے ہیں۔
