سریندر نگر۔ گجرات کے سریندر نگر ضلع میں سورت ٹریفک پولیس کے ایک انسپکٹر کے خلاف ایک خاتون کو ہراساں کرنے اور اسے اور اس کے خاندان کو قتل کرنے کی دھمکی دینے کے الزام میں مقدمہ درج کیا گیا ہے۔سریندر نگر شہر کے گھگھری پارک سوسائٹی میں رہنے والی دو بچوں کی ماں پرینکا بین پرمار نے جمعرات کی شام درج کروائی گئی اپنی شکایت میں الزام لگایا کہ ٹریفک پولیس انسپکٹر یشپال گوہل اسے 2016 سے شادی کرنے کے لیے ہراساں کررہا ہے۔
نومبر 2021 میں گوہل کا ڈرائیورجتن اس کے گھر پہنچا اور اسے ملزم سے بات کرنے پرمجبورکیا۔ جیسا کہ پرمارگوہل کی باتوں سے متفق نہیں تھا، اس نے اسے تھپڑ مارا اور اس کے بچوں اور شوہر کو جان سے مارنے کی دھمکی دی۔اس نے مزید الزام لگایا ہے کہ گوہل نے غیر قانونی طور پر اس کے خاندان کے سیل نمبروں کو نگرانی پر لگایا اور اس کا پیچھا کیا۔گوہل نے اس کی تصویر کو بھی مسخ کیا جس میں اسے اور پرمار کو ایک شادی شدہ جوڑے کے طور پر دکھایا گیا اور اسے اپنے شوہرکے بھائی کو بھیج دیا۔پرمار نے کہا کہ گوہل نے انہیں قابل اعتراض ٹیکسٹ میسیج بھی بھیجے۔گوہل پر تعاقب ،جنسی استحصال، گھر میں گھسنے، جان سے مارنے یا زخمی کرنے کی دھمکی اور انفارمیشن اینڈ ٹیکنالوجی ایکٹ کی دیگر دفعات کے تحت مقدمہ درج کیا گیا ہے۔
اس واقعہ کے منظر عام پر آنے کے بعد سوشل میڈیا پر عوام نے سخت برہمی ظاہر کی ہے ۔ٹوئٹر اور انسٹاگرام کے کئی صارفین نے جہاں خاتون سے ہمدردی ظاہر کی ہے وہیں پولیس عہدیدار کو شدیدتنقید کا نشانہ بناتے ہوئے کہا کہ جو لوگ عوام کی حفاظت کےلئے مختلف مقامات پر تعینات کئے جاتے ہیں اگر وہ عوام کی حفاظت کو چھوڑکر انہیں ہراساں کرنے ، ڈرانے اور دھمکانے لگ جائیں تو پھر عوام اپنے مسائل کےلئے کس سے رجوع ہوں گے ؟
