نئی دہلی۔ لوک سبھا انتخابات میں مشرقی دہلی سے عام آدمی پارٹی کی امیدوار آتشی نے اپنے حریف بھارتیہ جنتا پارٹی کے امیدوار گوتم گمبھیر کے پاس دو ووٹر کارڈ ہونے کا الزام لگاتے ہوئے ان کے خلاف فوجداری شکایت درج کروائی ہے ۔
آتشی نے ٹوئٹر پر اس کی اطلاع دیتے ہوئے کہا مسٹر گوتم گمبھیر کا نام قرول باغ اور راجندر نگر دونوں اسمبلی حلقوں میں ووٹر کے طور پر درج ہے ۔ انہوں نے کہا کہ عوامی نمائندگی قانون 1950 کی دفعہ 17کے تحت کوئی شخص دو اسمبلی حلقوں سے ووٹر نہیں ہوسکتا۔ قانون کی دفعہ31 میں التزام ہے کہ ووٹر لسٹ میں نام کے بارے میں غلط اطلاع دینے پر ایک سال تک کی سزا ہوسکتی ہے ۔
آپ امیدوار نے کہا کہ نامزدگی کے وقت الیکشن آفسر کو دئے گئے حلف نامہ میں بھی گوتم گمبھیر نے یہ اطلاع دی ہے کہ ان کا نام قرول باغ اسمبلی حلقہ میں بھی ووٹر کی شکل میں درج ہے ۔ حلف نامے میں انہوں نے کہا کہ وہ راجندر نگر اسمبلی نشت سے ووٹر ہیں۔ اس معاملے میں عام آدمی پارٹی کے امیدوار نے فوجداری شکایت درج کروائی ہے ۔
آتشی نے ایک دیگر ٹوئٹ میں مشرقی دہلی لوک سبھا حلقے کے رائے دہندوں سے اپیل کی کہ وہ گمبھیر کو ووٹ دے کر اپنا ووٹ برباد نہ کریں کیوں کہ دو ووٹر شناختی کارڈ ہونے کی وجہ سے آج نہیں تو کل ا ن کا انتخاب مسترد ہونا ہے ۔ یاد رہے کہ ہندوستانی کرکٹ ٹیم کے سابق اوپنر گوتم گمبھیر نے حالیہ دنوں میں بی جے پی میں شمولیت اختیار کی ہے لیکن انہوں نے اپنے کرکٹ کرئیر کے دوران اکثر اقلیتی طبقے کے خلاف متنازعہ بیانات دیتے رہے ہیں۔
