نئی دہلی۔ ہندوستانی خاتون ٹی 20 کرکٹ ٹیم کی کپتان ہرمن پریت کاورکے پاس سابق کپتانوں کپل دیو اور مہندر سنگھ دھونی کی صف میں شامل ہونے کا شاندار موقع ہے۔ ہرمن پریت کی کپتانی میں ہندوستانی خاتون ٹیم آسٹریلیا میں رواں ٹی 20 ورلڈ کپ کے فائنل میں پہنچ چکی ہے اور ٹورنمنٹ کا خطابی مقابلہ اتوارکو ہندستان اور میزبان آسٹریلیا کے درمیان کھیلا جائے گا۔
ہرمن پریت اگر اتوارکو میلبورن میں ٹرافی اٹھانے میں کامیاب ہوتی ہے تو وہ کرکٹ ورلڈ کپ جیتنے والی ہندوستان کی تیسری کپتان بن جائیں گی۔ کپل کی کپتانی میں ہندستانی مرد ٹیم نے سال 1983 میں ویسٹ انڈیز کو شکست دے کر پہلی بار عالمی اعزاز جیتا تھا۔سال 2007 میں منعقد پہلے مرد ٹی 20 ورلڈ کپ میں دھونی کی کپتانی میں ہندوستان نے پاکستان کو شکست دے کر خطاب جیتا تھا۔ دھونی کی کپتانی میں ہی ہندوستان نے 2011 میں سری لنکا کو شکست دے کر 28 سال کے طویل وقفے کے بعد ونڈے ورلڈ کپ جیتا تھا۔
ہندستانی خاتون ٹیم 2005 میں جنوبی افریقہ کے سینچورین میں ون ڈے ورلڈ کپ کے فائنل میں آسٹریلیا سے 98 رنز سے شکست سے دو چارہوئی تھی۔ اس وقت ہندوستان کی کپتان متھالی راج تھیں۔ آسٹریلیا نے 50 اوور میں چار وکٹ پر 215 رن بنائے تھے جبکہ ہندستانی ٹیم 117 رن پر سمٹ گئی تھی۔متھالی کی ہی کپتانی میں ہندوستانی ٹیم 2017 میں انگلینڈ میں ہوئے ونڈے ورلڈ کپ کے فائنل میں پہنچی تھی جہاں اسے انگلینڈ سے شکست کا سامنا کرنا پڑا تھا۔
انگلینڈ نے50 اوور میں سات وکٹ پر 228 رن بنائے جبکہ ہندستانی ٹیم سخت جدوجہد کرنے کے باوجود48.4 اوور میں 219 رن پر سمٹ گئی تھی۔اسی ٹورنمنٹ کے سیمی فائنل میں ہندوستان نے ہرمن پریت کی ناٹ آوٹ 171 رنز کی طوفانی اننگز کے دم پر آسٹریلیاکو36 رنز سے شکست دی تھی۔ ہرمن پریت نے کرشمائی اننگز کھیلتے ہوئے 115 گیندوں پر ناٹ آوٹ 171 رنز میں 20 چوکے اور سات چھکے لگائے تھے لیکن اس مرتبہ قومی کپتان کی موجودہ ٹورنمنٹ میں بیٹ کے لحاظ سے مایوس کن کارکردگی رہی ہے اور وہ چارمیچوں میں 2،8،1 اور 15 رنز بنا پائی ہیں لیکن ہندوستانی ٹیم کو امید رہے گی کہ اس کی کپتان فائنل میں دھماکہ خیز بیٹنگ کریں اور ٹیم کو چمپئن بنائیں۔ہندوستان پہلی بارخاتون ٹی 20 ورلڈ کپ کے فائنل میں پہنچا ہے۔ جوکارنامہ متھالی 2005 اور 2017 میں نہیں کر پائی تھیں وہ کارنامہ ہرمن پریت کے پاس کر دکھانے کا موقع ہے۔
