ریاض۔ سعود ی عرب کے وزیر تجارت وسرمایہ کاری ماجد بن عبداللہ القسابی نے کہا ہے کہ ہندوستان سعودی عرب کا ایک انتہائی اہم تجارتی ساتھی ہے اور دونوں ملکوں کے مابین اسٹریٹیجک پارٹنرشپ کونسل معاہدہ پر دستخط ہوجانے کے بعد اب تعلقات میں مزید اضافہ ہوگا۔
یہاں جاری تین روزہ فیوچر انویسٹمنٹ انیشی ایٹیو (ایف آئی آئی) کانفرنس کے اختتام سے قبل ہندوستانی میڈیا کے ساتھ بات چیت کرتے ہوئے سعودی وزیر نے کہا کہ سعودی عرب ہندوستان کو تیل کی سربراہی کا سب سے اہم ملک ہے اورکونسل کے قیام کے بعد دونوں ملک مختلف شعبوں میں مزید تعاون کرسکیں گے ۔ انہوں نے کہ ہندوستان مشرقی ایشیا وسطی ایشیا اور سعودی عرب کے لئے ایک بڑا پلیٹ فارم بن سکتا ہے ۔
خیال رہے کہ ہندوستان دنیا میں تیل استعمال کرنے والا تیسرا سب سے بڑا ملک ہے اور تیل کی اپنی ضرورت پورا کرنے کے لئے عراق کے بعد سب سے زیادہ تیل سعودی عرب سے ہی درآمدکرتا ہے۔ سعودی عرب نے مالی سال 2018-19میں ہندوستان کو 40.33 ملین ٹن تیل فروخت کیا تھا۔ ہندوستان سعودی عرب سے ہر ماہ تقریباً دو لاکھ ٹن ایل پی جی گیس بھی درآمد کرتا ہے ۔
سعودی وزیرکامرس وسرمایہ کاری نے کہا دونوں ملکوں کی 70فیصد آبادی کی عمر 40 برس عمرگروپ سے نیچے کی ہے اور اس عمر گروپ کے افراد کو ٹکنالوجی سے کافی دلچسپی ہے ۔ چونکہ ہندوستان کو فضائیہ، ٹکنالوجی انٹرپرنیورشپ، اسمال اورمیڈیم سائزکے انٹرپرائزیز میں سبقت اور مہارت حاصل ہے اس لئے یہ دونوں ملکوں کے لئے فائدہ کا سودا ہے۔
یہ بات قابل ذکر ہے کہ سعودی عرب نے گذشتہ ماہ کہا کہ وہ ہندوستان میں توانائی، ریفائنری، پیٹروکیمیکلس، انفرااسٹرکچر، زراعت،کان کنی او رمعدنیات کے شعبوں میں 100ارب ڈالرس کی سرمایہ کاری کرنا چاہتا ہے ۔ اس سلسلے میں ایک سوال کا جواب دیتے ہوئے القسابی نے کہا کہ ہم ہندوستان میں خانگی شعبوں کے ساتھ مل کر ایک ریفائنری قائم کرنے پر غورکررہے ہیں۔ بلکہ ہم نے اس سلسلے میں پیش رفت بھی کی ہے جیسا کہ وزیر اعظم نریندر مودی بھی کہہ چکے ہے ۔ انہوں نے مہاراشٹر میں مجوزہ رائے گڑ ھ ریفائنری کا حوالہ دیتے ہوئے کہا یہ بہت بڑی سرمایہ کاری ہے ۔ اس ریفائنری کے قیام میں 60 ارب ڈالرس کی سرمایہ کاری کی جائے۔ ہندوستان میں کافی مواقع ہے اور اس کی وجہ سے یہ سرمایہ کاری کی جارہی ہے ۔
ہندوستان میں سرمایہ کاری کے متعلق ایک دیگر سوال کا جواب دیتے ہوئے سعودی وزیرکامرس نے کہا کہ ارامکو ہندوستان میں سرمایہ کاری کرنے والی سعودی عرب کی سب سے بڑی کمپنی ہے ۔انہوں نے مزیدکہا کہ سعودی عرب ٹکنالوجی، فارماسیوٹیکل ، زراعت اور سیاحت جیسے شعبوں میں اپنے موقف کو بہتر بنانے کے لئے ہندوستانی صلاحیت کا استعمال کرسکتا ہے ۔ خیال رہے کہ پچھلے چند برسوں کے دوران دونوں ممالک کے باہمی تعلقات میں کافی تیزی آئی ہے ۔ 2017-18 میں سعودی عرب کے ساتھ ہندوستان کی باہمی تجارت 27.48بلین ڈالرس تھی جس کی وجہ سے سعودی عرب ہندوستان کا چوتھا سب سے بڑا تجارتی ساتھی بن گیا ہے ۔
