لندن۔ پاکستانی ٹیم کے کوچ مکی آرتھر نے انکشاف کیا ہے کہ ہندوستان کے خلاف میچ میں شکست کے بعد ہونے والی تنقید اور دباو کے سبب وہ خودکشی کرنے کا سوچ رہے تھے اگر ایسا کچھ ہوجاتا تو پھر پاکستانی ٹیم پر یہ دوسرا داغ لگ جاتا کیونکہ 2007 ورلڈکپ میں بھی پاکستان کی ناقص کارکردگی اور پہلے ہی مرحلے سے اخراج کے بعد اس وقت کے کوچ باب وولمر ہوٹل کے اپنے کمرے میں مردہ پائے گئے تھے اور انکی موت آج بھی ایک معمہ بنی ہوئی ہے۔
آرتھر نے کہا کہ آسٹریلیا کے بعد ہندوستان کے خلاف میچ میں بدترین شکست کے بعد ٹیم کی کارکردگی کو شدید تنقید کا نشانہ بنایا گیا تھا اور کوچنگ اسٹاف کی کارکردگی پر بھی سوالات اٹھائے گئے تھے۔ جنوبی افریقہ کے خلاف میچ میں فتح کے بعد مکی آرتھر نے کہا کہ یہ سب کچھ بہت تیزی سے ہوا تھا، ہم ایک میچ ہارے، پھر ایک اور میچ ہار گئے، ورلڈ کپ میں میڈیا کے سوالات، عوامی توقعات کا بوجھ بھی ہوتا ہے اور ہم پھر ہم ایسے موقف میں آ گئے جہاں ہمیں ورلڈ کپ میں اپنی جگہ بچانے کے لالے پڑ گئے، گزشتہ اتوار ایسا موقع آیا کہ میں خودکشی کرنا چاہ رہا تھا۔
مکی آرتھر نے کہا کہ اس میچ میں شکست کے بعد کھلاڑی میڈیا، عوام اور سوشل میڈیا کی وجہ سے بہت زیادہ دکھی تھے، وہ زیادہ سو بھی نہیں سکے۔ میں جانتا ہوں کہ جب ہمیں دیوار سے لگا دیا جاتا ہے تو ہم کچھ اچھی کارکردگی دکھاتے ہیں، امید ہے کہ آج کی کارکردگی کے بعد کچھ ناقدین کے منہ بند ہو جائیں گے۔مکی آرتھر نے کہا ہم اب بھی ٹورنمنٹ میں آگے جا سکتے ہیں اور اگر ہم اپنی پوری صلاحیت کے مطابق کھیلیں تو ہم کسی کو بھی ہرا سکتے ہیں پھر چاہے وہ نیوزی لینڈ ہو، بنگلہ دیش یا افغانستان۔ پاکستانی ٹیم کے کوچ نے کہا کہ کھلاڑی صد فیصد محنت کر رہے ہیں، وہ اپنے ملک کی نمائندگی کرتے ہوئے بہت پرجوش ہیں اور وہ اپنی کرکٹ کے حوالے سے بھی بہت پرجوش ہیں، ہم ٹورنامنٹ دیگر ٹیموں کی طرح بہترین ٹیم ہیں۔
پریس کانفرنس کے دوران ایک صحافی نے سوال کیا کہ اننگز کے آخری اوورز میں حارث سہیل تھکے ہوئے نظر آ رہے تھے اور پاکستان نے آخری تین اوورز میں صرف 20 رنز بنائے تاہم اس سوال کے جواب میں ٹیم کے کوچ نے صحافی پر برہمی کا اظہار کیا۔ انہوں نے جواب دیتے ہوئے کہا کہ آپ حارث کے بارے میں کچھ مثبت کیوں نہیں لکھتے؟ انہوں نے 59گیندوں پر89 رنز بنائے، آپ ہمارے کھلاڑیوں کے بارے میں ہر وقت منفی باتیں ہی کیوں کرتے ہیں؟ میں آج تک جو بھی بہترین اننگز دیکھی ہیں ان میں حارث سہیل کی اننگز بھی شامل ہے، آپ لوگ بہتری کے لیے کچھ مثبت لکھیں۔
