نئی دہلی۔ ہندوستان نے پاکستان کی ان میڈیا رپورٹس کی تردید کی ہے جن میں کہا گیا ہے کہ ہندوستان پاکستان کے ساتھ بات چیت شروع کرنے کے لئے تیار ہے ۔ وزارت خارجہ کے ترجمان رویش کمار نے پاکستانی میڈیا رپورٹس کے بارے میں پوچھے جانے پر ان رپورٹس کو مکمل طور پر بے بنیاد قرار دیا۔ انہوں نے کہا کہ سفارتی روایات کے مطابق وزیر اعظم نریندر مودی اور وزیر خارجہ ڈاکٹر ایس جے شنکر نے پاکستان کے وزیر اعظم عمران خان اور وزیر خارجہ شاہ محمود قریشی کی جانب سے ملنے والے مبارکباد کے پیغامات کا جواب دیا تھا۔ اپنے پیغامات میں مودی اور ایس جے شنکر نے کہا تھا کہ ہندوستان ، پاکستان سمیت اپنے تمام پڑوسیوں سے عام اور مکمل تعاون کا تعلقات چاہتا ہے ۔
کمار نے کہا کہ وزیر اعظم نے اپنے پیغام میں کہا تھا کہ اس کے لئے یہ بہت اہم ہے کہ اعتماد و بھروسہ کا ایک ماحول بنایا جائے جو دہشت گردی، تشدد اور بدنیتی سے آزاد ہو۔ وزیر خارجہ نے بھی دہشت گردی اور تشدد کے سائے سے آزاد ایک سازگار ماحول بنائے جانے کی ضرورت پر زور دیا تھا۔پاکستان کے اخبار میں شائع ایک رپورٹ میں کہا گیا کہ ہندوستان جنوبی ایشیائی خطے میں امن اور خوشحالی کے لئے پاکستان اور دیگر علاقائی ممالک کے ساتھ بات کرنے کو تیار ہے ۔ ہندوستانی قیادت نے کہا ہے کہ بات چیت شروع کرنے کے ساتھ ساتھ دہشت گردی کے خاتمے پر خصوصی توجہ مرکوز رہے گی۔
کمار نے کہا کہ یہ رپورٹ مکمل طور پر غلط ہے ۔ وزیر اعظم اور وزیر خارجہ نے مبارکباد پیغامات کا جواب سفارتی روایات کے مطابق دیا تھا۔ یاد رہے کہ پاکستان نے اس سے قبل کہا تھا کہ ہندوستان نے اس کے ساتھ بات چیت کی خواہش کا اظہار کیا ہے ۔ پاکستان میں میڈیا رپورٹس میں دفتر خارجہ کے ذرائع کے حوالہ سے یہ اطلاع دی گئی ہے ۔ اس کے مطابق ہندوستانی وزیر اعظم نریندر مودی نے پاکستانی وزیر اعظم عمران خان اور ہندوستانی وزیر خارجہ ایس جے شنکر نے وزیر خارجہ شاہ محمود قریشی کو اس سلسلہ میں مکتوب لکھا ہے ۔ قبل ازیں عمران خان نے مودی کے دوبارہ اقتدار میں آنے پر انہیںتحریر کردہ مبارکباد کے خط میں دونوں ممالک کے درمیان بات چیت کی خواہش ظاہر کی تھی۔ انہوں نے جموں وکشمیر تنازعہ اور دہشت گردی سمیت مختلف مسائل پر بات چیت کی پیشکش کی تھی۔
