حیدرآباد ۔نیوزی لینڈ کے خلاف ہندوستان کی شکست نے گروپ 2 سے سیمی فائنل میں رسائی کےلئے دوسری ٹیم کو کافی دلچسپ موقف میں پہنچا دیا ہے۔ اس گروپ سے پاکستانی ٹیم اپنے ابتدائی تین مقابلوں میں کامیابی حاصل کرتے ہوئے سرفہرست اور اس کے پاس دو نسبتاً آسان مقابلے باقی ہیں جس سے یہ تقریباً طے ہے اس گروپ سے پاکستان پہلے مقام کے ساتھ سیمی فائنل میں رسائی حاصل کرے گی ۔اس کے بعد دوسری ٹیم کےلئے افغانستان ،نیوزی لینڈ اور ہندوستان کی دوڑ کافی سخت ہوچکی ہے ۔
نیوزی لینڈ کے خلاف شکست کا جو بڑا فرق درج ہوا ہے اس کا مطلب یہ بھی ہے کہ ہندوستان کے نیٹ رن ریٹ کو کافی نقصان ہوا ہے اور وہ اب اپنے تینوں مقابلوں میں بڑی فتوحات حاصل کرنے کے بعد بھی دوسری ٹیموں کے نتائج پر انحصار کرے گی ۔یہاں اعداد شمار کافی دلچسپ ہوچکے ہیں جن کی بنیاد پر اس گروپ سے سیمی فائنل کےلئے دوسری ٹیم کا تعین ہوگا ۔ نیوزی لینڈ، افغانستان اور ہندوستان کس طرح سیمی فائنل میں رسائی حاصل کریں گے ان کے اعداد شمار کچھ اس طرح ہیں ۔
: ہندوستان
دو مقابلے کھیل چکا ہے ،نشانات : 0 رن ریٹ1.609۔ باقی مقابلے: بمقابلہ افغانستان، سکاٹ لینڈ، نمیبیا۔ ہندوستان کے پاس اب ایک ہی موقع ہے کہ وہ اپنے باقی تین مقابلوں میں بڑے فرق سے کامیاب ہو اور پھر امید کرے کہ نیوزی لینڈ اور افغانستان کم از کم اپنے باقی میچوں میں سے ایک مقابلہ ہار جائیں۔ ا س کے بعد پھررن ریٹ کا کھیل شروع ہوسکتا ہے۔ ہندوستان کو نیوزی لینڈ کے خلاف شکست نے کافی نقصان پہنچایا ہے اور رن ریٹ منفی میں چلا گیاہے
: نیوزی لینڈ
کھیلے گئے مقابلے دو، نشانات: 2، رن ریٹ 0.765، باقی میچز:بمقابلہ اسکاٹ لینڈ، نمیبیا، افغانستان ۔ہندوستان کے خلاف 14.3 اوورز میں مطلوبہ رنز کا کامیاب تعاقب کرنے کا مطلب ہے کہ نیوزی لینڈ کا رن ریٹ 0.765 تک بہتر ہوگیا ہے۔ اگر وہ اپنے باقی مقابلے جیت جاتے ہیں تو وہ دوسرے نتائج سے قطع نظر سیمی فائنل میں رسائی حاصل کر لیں گے۔ ان کے باقی تین حریفوں میں سے افغانستان سب سے مشکل ہے، اور اگر وہ یہ مقابلہ ہارجاتے ہیں تو وہ دیگر مقابلوں کے نتائج کے لحاظ سےسیمی فائنل میں رسائی سے محروم ہو سکتے ہیں۔ ان کے اگلے تین میچوں کا شیڈول آسان نہیں ہے: وہ تین مختلف مقامات پر ان دن کے وقفہ کے ساتھ دن میں مقابلے کھیلیں گے – 3 نومبر کو دبئی میں اسکاٹ لینڈ کے خلاف، 5 نومبر کو شارجہ میں نمیبیا کے خلاف اور ابوظہبی میں افغانستان کے خلاف مقابلہ ۔
:افغانستان
کھیلے گئے مقابلے3، پوائنٹس: 4، رن ریٹ 3.097، باقی میچز:بمقابلہ ہندوستان، نیوزی لینڈ ۔افغانستان نے اسکاٹ لینڈ اور نمیبیا کے خلاف اپنے میچوں سے زیادہ سے زیادہ فوائد حاصل کرلیے ہیں ، یہی وجہ ہے کہ ان کا رن ریٹ 3.097 ہے جوکہ بہت اچھا ہے۔ ان کے باقی دو میچز دو بڑی ٹیموں ہندوستان اور نیوزی لینڈ کے خلاف ہیں۔ اگر وہ دونوں جیت جاتے ہیں تو وہ بغیر کسی اعداد شمار کے کھیل کے راست سیمی فائنل میں رسائی حاصل کرلیں گے ۔ اگر وہ ہندوستان سے ہار جاتے ہیں اور نیوزی لینڈ کو شکست دیتے ہیں تو شاید رن ریٹ کام میں آجائیں گے۔ افغانستان کو شیڈول سے ایک فائدہ ہو سکتا ہے: انہوں نے جہاں ابوظہبی میں نمیبیا کو شکست دی وہیں اب وہ اپنے آخری دو مقابلوں میں شرکت کریں گے جس سے ٹیم کو فائدہ ہوگا۔
