نئی دہلی۔ اترپردیش کی کانگریس انچارج اورجنرل سکریٹری پرینکا گاندھی نے یوگی آدتیہ ناتھ کی حکومت کی جانب سے پیش کردہ بجٹ پرطنز کرتے ہوئے کہا ہے کہ بجٹ تو آگیا ہے لیکن اس میں لوگوں اورخصوصاً کسانوں کے مسائل کا کوئی حل نہیں ہے۔ پرینکا گاندھی نے کسانوں کے کچھ مسائل کو بھی اٹھایا۔
پرینکا گاندھی نے طنز کرتے ہوئے کہا کہ، اترپردیش حکومت کا بجٹ آیا ہے۔ انہوں نے کہا کہ حکومت صرف بجٹ لے کر آئی ہے اور اس میں ریاست کے کسانوں سے متعلق کسی بھی مسئلے کے حل کےلئے کوئی قدم نہیں اٹھایا گیا ہے۔
پرینکا گاندھی نے ٹویٹ میں لکھا، اتر پردیش حکومت کا بجٹ آیا ہے۔ کسانوں کے آوارہ جانوروں کے مسئلے کا حل اس میں سے غائب ہے۔ گنے کا بقایا جات غائب ہے۔ کسانوں کی فصل کی بربادی کا معاوضہ غائب ہے۔ کسانوں کی فصل کے دام کی بات غائب ہے۔
پرینکا گاندھی نے اپنے ٹوئٹ کے ساتھ ایک ویڈیو بھی شائع کی ہے جس میں کئی کسان اپنی پریشانوں کے بارے میں بات کر رہے ہیں۔ اس ویڈیو کو بجٹ کے بعد کسان کی رائے کا نام دیا گیا ہے۔
واضح رہے کہ منگل کے روز یوپی اسمبلی میں یوگی کی حکومت نے بجٹ 2020 پیش کیا تھا۔ پانچ لاکھ کروڑ سے زیادہ کے اس بجٹ پر تمام اپوزیشن جماعتوں نے تنقید کی ہے۔ بجٹ پر اپنا تلخ تبصرہ کرتے ہوئے کانگریس کے ریاستی صدر اجے کمار للو نے کہا کہ اعدادوشمار کی بازی گری میں ماہر یوگی حکومت نے نوجوانوں اورکسانوں کے ساتھ فریب کیا ہے۔
للو نے کہا کہ گذشتہ دو سال کے اندر ریاست میں نوجوان بے روزگاروں کی تعداد 12.5 لاکھ تک بڑھ گئی ہے۔ بجٹ میں سبکدوش ٹیچروں کو ثانوی تعلیمی بورڈ میں نوکری دینے کا اعلان بے روزگار نوجواں کے ساتھ اعتماد شکنی ہے۔ وہیں فروغ ہنر مندی اسکیم بھی فریب دہی پر مبنی ہے۔
