حیدرآباد۔ شہرحیدرآباد میں اتوار کی علی الصبح سے بارش کا ایک سلسلہ شروع ہوچکاہے اور وقفہ وقفہ سے بارش ہورہی ہے جس کی وجہ سے نہ صرف شہر میں بلکہ ریاست تلنگانہ میں بھی آبی ذخائر میں آبی سطح میں اضافہ ہوا ہے ۔جنوب مغرب مانسون کی جلد آمد کے نتیجہ میں آبگیر علاقوں میں ہوئی بارش کے سبب دریائے کرشنا کے اہم آبپاشی پروجیکٹس کی آبی سطح میں اضافہ ہوا ہے ۔جورالہ، سری سیلم ریزروائرس میں بالترتیب 25,344 اور21,146کیوزک پانی کا بہاو درج کیاگیا جس سے کسانوں کو بغیر کسی مشکل کے بیج بونے میں سہولت ہورہی ہے ۔کرناٹک میں ہوئی شدید بارش کے سبب جورالہ پروجیکٹ میں 25,344 کیوزک پانی کا بہاو درج کیاگیا۔اس کی مکمل سطح آب 1045فیٹ کے برخلاف اس کی سطح آب 1,041.24فیٹ درج کی گئی۔
پڑوسی ریاست آندھراپردیش کے کرنول ضلع میں واقع سُنکے سیلا ریزروائر اور تلنگانہ کے ضلع محبوب نگر کے جورالہ پروجیکٹ میں پانی کا شدید بہاو دیکھاجارہا ہے ۔گوداوری طاس میں کڈم، لوور مڈمانیر ڈیم،سنگور، سری پد یلم پلی اور سری رام ساگر پروجیکٹ میں بھی پانی کے بہاو میں اضافہ درج کیاجارہا ہے ۔عہدیداروں نے کہا ہے کہ آئندہ چند ہفتوں کے دوران مزید بارش کی توقع ہے جس کے سبب یہ تمام پروجیکٹس لبریز ہوجائیں گے ۔عموما مانسون کی تلنگانہ میں آمد جون کے دوسرے ہفتہ میں ہوتی ہے تاہم اس مرتبہ جون کے پہلے ہفتہ میں ہی اس کی آمد ہوگئی ہے جس کے نتیجہ میں اوسط بارش ہوئی اور کئی پروجیکٹس کی سطح میں بتدریج اضافہ ہوتاجارہا ہے ۔محکمہ آبپاشی کے عہدیدار نے یہ بات بتائی۔
شمالی ساحلی آندھراپردیش،یانم اور جنوبی ساحلی آندھراپردیش میں یکم جولائی کو ایک یا دو مقامات پر بارش کا امکان ہے ۔محکمہ موسمیات نے یہ بات بتائی۔اپنے بلیٹن میں اس نے کہا کہ تلنگانہ میں یکم جولائی کو بعض مقامات پر بارش کا امکان ہے ۔آئندہ پانچ دنوں کے دوران تلنگانہ،شمالی ساحلی آندھرا،یانم اور جنوبی ساحلی آندھراپردیش کے ساتھ ساتھ رائل سیما میں بارش کاامکان ہے ۔جنوب مغرب مانسون تلنگانہ میں کمزور ہوگیا ہے ۔گذشتہ 24گھنٹوں کے دوران کاماریڈی ضلع کے بعض مقامات پربارش ہوئی۔
