بغداد ۔عراقی دارالحکومت بغداد کے التحریر اسکوائر میں مظاہرے کے دوران عراقی جوڑے نے شادی کرتے ہوئے تناؤ کے ماحول کو خوشگوار یادوں میں تبدیل کردیا ہے ۔تفصیلات کے مطابق عراقی جوڑے نے مظاہرے کے دوران دھوم دھام سے شادی کی ۔ مظاہرین نے شادی کے گیت گا کر نئے جوڑے کی خوشیاں دوبالا کردیں۔
رکشہ ڈرائیوروں نے جلوس کی شکل میں دولہا اور دلہن کو ان کے گھر تک پہنچایا۔ عراقی جوڑا عروسی لباس میں مظاہرین کے ساتھ اظہار یکجہتی کے لیے قومی پرچم اٹھائے ہوئے تھا۔ واضح رہے کہ بغداد اور عراق کے مختلف صوبوں میں ایک ہفتے سے مظاہروں کا سلسلہ جاری ہے۔
عراق کے انسانی حقوق کمیشن نے ہفتے کو جنوبی شہر بصرہ میں سیکیورٹی فورسز اور مظاہرین کے درمیان جھڑپوں میں 120 افراد کے زخمی ہونے کی تصدیق کی ہے۔ عراقی انسانی حقوق کمیشن کے مطابق عراقی سیکیورٹی فورسز نے ہفتے کو بصرہ میں سینکڑوں مظاہرین کو منتشر کرنے کے لیے براہ راست فائرنگ اور شیلنگ کی ہے۔ زخمیوں کا دواخانوں میں علاج کیا جا رہا ہے ۔
دواخانوں کے ذرائع نے کہا ہے کہ بغداد کے التحریر اسکوائر میں ہفتے کی صبح ہونے والی جھڑپوں میں ایک شخص ہلاک ہوگیا جبکہ درجنوں زخمی ہیں ۔ بصرہ میں جنوبی بندرگاہ ام قصر کی جانب جانے والی شاہراہوں پر ہزاروں افراد نے دھرنا دے رکھا ہے ۔ بندرگاہ پر گذشتہ چہارشنبہ سے تمام سرگرمیاں معطل ہیں۔مظاہرین نے بصرہ میں واقع مجنون آ ئل فیلڈ کی جانب جانے والی شاہراہ کو بھی بلاک کردیا ہے۔
