کراچی ۔ پاکستان میں 10 سال بعد ٹسٹ کرکٹ کی واپسی ہورہی ہے جیسا کہ پاکستان کرکٹ بورڈ (پی سی بی) نے 10 سال بعد پاکستان میں ٹسٹ کرکٹ کی واپسی کا اعلان کرتے ہوئے پاکستان اور سری لنکا کے درمیان ٹسٹ سیریز کا شیڈول جاری کردیا ہے۔ پی سی بی سے جاری پریس ریلیز کے مطابق پاکستان اور سری لنکا کے درمیان کھیلے جانے والی ٹسٹ سیریز کا پہلا میچ 11 تا 15 دسمبر تک پنڈی کرکٹ اسٹیڈیم جبکہ دوسرا 19 تا 23 دسمبر تک نیشنل اسٹیڈیم کراچی میں کھیلا جائے گا۔
سری لنکا نے 2 ٹسٹ میچز پر مشتمل سیریز کے لیے رواں برس اکتوبر میں اور پھر دسمبر میں وائٹ بال کرکٹ کے لیے واپس آنا تھا لیکن سری لنکا نے سیکیورٹی صورتحال کا جائزہ لینے کے لیے محدود فارمیٹ کی سیریز کو ٹسٹ میچ سے تبدیل کردیا تھا۔ پی سی بی کے مطابق سری لنکا کرکٹ نے پاکستان میں ونڈے اور ٹی ٹوئنٹی میچز پر مشتمل سیریز کے کامیاب انعقاد کے بعد فیوچر ٹورز پروگرام کے تحت ٹسٹ سیریز کی تصدیق کی ہے۔ اس حوالے سے پاکستان کرکٹ بورڈ کے ڈائریکٹر انٹرنیشنل کرکٹ ذاکر خان نے کہا کہ یہ پاکستان کے لیے ایک شاندار خبر ہے جس سے ثابت ہوتا ہے کہ دنیا کے کسی اور ملک کی طرح پاکستان بھی ایک محفوظ ملک ہے۔
انہوں نے کہا کہ ہم ٹسٹ سیریز کے لیے ٹیم روانہ کرنے پر سری لنکا کے مشکور ہیں جو بین الاقوامی کرکٹ کی بحالی میں پی سی بی کوششوں کا نتیجہ ہے اور اس سے نوجوان نسل اور شائقین کو بھی کرکٹ کی جانب راغب کرنے میں مدد ملے گی۔ ڈائریکٹر انٹرنیشنل کرکٹ نے کہا کہ ٹسٹ سیریز کی تصدیق کے بعد اب ہماری توجہ سیریز کے انتظامات کے اعلیٰ معیار کے مطابق یقینی بنانے پر مرکوز ہوگی۔ اس ٹسٹ سیریز کو کھلاڑیوں، حکام، شائقین اور میڈیا کے لیے یادگار بنانے میں ہم کوئی کسر نہیں چھوڑیں گے۔
علاوہ ازیں سری لنکا کرکٹ کے چیف ایگزیکٹو ایشلے ڈی سلوا نے دورہ پاکستان کی تصدیق کی اور کہا کہ ہمارے پہلے دورے کی بنیاد پر ہم پرسکون ہیں اور یقین ہے کہ ٹسٹ سیریز کے لیے صورتحال سازگار ہوگی۔ یاد رہے کہ 2009 میں سری لنکن ٹیم پر لاہور میں ہوئے دہشت گرد حملے کے بعد سے پاکستان نے اپنی سرزمین پر کسی بھی ٹسٹ میچ کی میزبانی نہیں کی تھی۔ اس کے بعد سے پاکستان کو اپنی تمام ہوم سیریز متحدہ عرب امارات میں کھیلنی پڑیں لیکن وہاں سیریز کا انعقاد پر پی سی بی کی خطیر رقم خرچ ہوتی ہے اور اسی وجہ سے بورڈ ایک عرصے سے غیرملکی ٹیموں کو پاکستان آکر کھیلنے کے لئے آمادہ کرنے کی کوشش کر رہا تھا۔
سال 2015 میں زمبابوے کی ونڈے سیریز میں میزبانی کرنے کے بعد ٹسٹ کھیلنے والے تین ملکوں پر مشتمل ورلڈ الیون نے 2017 میں پاکستان کا دورہ کر کے تین ٹی20 انٹرنیشنل میچوں کی سیریز کھیلی تھی۔ پھر سری لنکا کی ٹیم ایک ونڈے میچ کھیلنے پاکستان آئی تھی جس کے بعد ویسٹ انڈیز نے تین ٹی20 میچوں کی سیریز کے لیے پاکستان کا دورہ کیا تھا اور اس کے بعد پی سی بی ملک میں عالمی کرکٹ کی مکمل بحالی کے حوالے سے آگے بڑھ رہا ہے۔ اس دوران ملک میں پاکستان سوپر لیگ کے میچز کا انعقاد بھی ہوتا رہا جس میں دنیا بھر کے اسٹارز نے شرکت کی خصوصاً پاکستان سوپر لیگ کے چوتھے ایڈیشن کے 8 میچز پاکستان میں منعقد ہوئے جس میں تمام ہی ٹیموں کے غیرملکی کھلاڑیوں نے کراچی آکر میچز کھیلے
