ریاض ۔سعودی دارالحکومت ریاض میں کئی دنوں سے بارش کا سلسلہ جاری ہے۔ گزشتہ روزہوئی مسلسل بارش کے باعث سڑکیں زیر آب آگئیں۔ ٹریفک کی روانی متاثر ہوئی اور عام زندگی مفلوج ہوگی اور اس کا اثر یہاں رواں ریاض سیزن پر بھی پڑا ہے ۔ بارش کے پیش نظر ریاض سیزن میں کئی اہم پروگرام ملتوی کردیے گئے۔
تفصیلات کے مطابق ریاض میں موسلا دھار بارش کا سلسلہ منگل کو بھی جاری رہے گا ۔محکمہ موسمیات نے خبر دار کیا ہے کہ ریاض شہر اور اس کی کمشنریوں میں منگل کو بھی موسلا دھار بارش متوقع ہے ۔ ریاض علاقے میں برفباری کا قوی امکان ہے ۔گرد آلو دہواؤں کی وجہ سے حد نظر محدود ہو جائے گی ۔ الدر عیہ ڈیولپمنٹ اتھارٹی کے ترجمان ثامر السدیری نے کہا ہے کہ بارش کے باعث بوابہ الدر عیہ کی افتتاحی تقریب 19 نومبر کے بجائے 20 نومبر کو ہوگی ۔
ریاض سیزن کی انتظا میہ نے معروف عرب گلوکارہ احلام کا کنسرٹ موسم کی خرابی کے باعث ملتوی کردیا ۔اس موقع پر انا عربیہ ( میں عرب خاتون) فورم میں انعامات کی تقریب بھی موسلادھار بارش کے باعث نہیں ہوسکی۔کنسرٹ کے ٹکٹ اٹھارہ ہزار ریال تک میں فروخت ہوئے تھے۔ریاض سیزن کی انتظامیہ نے مسلسل بارش کے باعث ونٹر ونڈر لینڈ ،نبض الریاض اور وادی نمار میں ہونے والے تمام پروگرام بھی ملتوی کردیے ہیں ۔منگل کو بارش کا سلسلہ ختم ہونے پر پروگرام دوبارہ ہوں گے۔
دریں اثنا عسیر ریجن اور باحہ ریجن میں پیر کو طوفانی بارش سے نظام زندگی مفلوج ہوگیا علاقے زیر آب آگئے۔ان تمام حالات کے پیش نظر ریاض سیزن میں اب جنوری تک توسیع کردی گئی ہے۔سعودی ولی عہد شہزادہ محمد بن سلمان نے ریاض سیزن میں توسیع کردی۔ اب یہ 15دسمبر 2019 کے بجائے جنوری 2020 کے اختتام تک جاری رہے گا۔تفصیلات کے مطابق محکمہ تفریحات کے سربراہ ترکی آل الشیخ نے ٹویٹر پراعلان کیا کہ ایک ماہ کے دوران ریاض سیزن دیکھنے کے لیے آنے والوں کی تعداد 76لاکھ 50 ہزار تک پہنچ گئی۔
ریاض سیزن 11اکتوبر 2019 کو شروع ہوا تھا۔ پروگرام کے مطابق 15دسمبر 2019 کو ختم ہونے والا تھا تاہم عوامی پذیرائی ملنے پر ولی عہد شہزادہ محمد بن سلمان نے اس میں 45 دن کا مزید اضافہ کردیا۔ اب یہ جنوری کے آخر تک جاری رہے گا۔یاد رہے کہ ریاض سیزن میں 46 ہزارسعودیوں کو محدود وقت کے لیے جز وقتی ملازمت کے مواقع ملے ہیں۔سعودی جنرل انٹرٹینمنٹ اتھارٹی کے چیئرمین اور ریاض سیزن کے سربراہ ڈاکٹر ترکی آل الشیخ کے مطابق تفریحی شعبے میں 2030 تک ڈھائی لاکھ مستقل ملازمتوں کے مواقع حاصل ہوں گے۔
ریاض سیزن میں بڑی تعداد میں مختلف کمپنیاں اور سپانسرز کا تعاون بھی حاصل ہے۔ اس حوالے سے 80 فیصد ہدف حاصل کرلیا گیا جو 400 ملین سعودی ریال کے لگ بھگ ہے۔ریاض سیزن کے تحت فیسٹول میں 12مقامات پر 100سے زائد پروگرام پیش کیے جا رہے ہیں جس میں آتش بازی، سرکس، موسیقی، سفاری پارک، تھیٹر اور دیگر بہت سی سرگرمیاں شامل ہیں۔
