دبئی میں 27 مئی سے معاشی سرگرمیاں بحال کرنے کا اعلان

دبئی ۔دبئی میں حکام نے 27 مئی سے معاشی  سرگرمیاں بحال کرنے اور آزادانہ نقل وحرکت کی اجازت دینے کا فیصلہ کیا ہے۔ روزانہ صبح 6 سے رات 11 بجے تک تجارتی ادارے کھلے رہیں گے۔ ولی عہد دبئی اور ایگزیکٹیو کونسل کے سربراہ شیخ حمدان بن محمد بن راشد آل مکتوم نے عید الفطر کے چوتھے دن سے دبئی میں اقتصادی سرگرمیوں کی بحالی کا اعلان کیا ہے۔

تفصیلات کے مطابق دبئی کے ولی عہد نے کہا ہے کہ اقتصادی سرگرمیاں شروع کرنے کا فیصلہ امارات کے نائب صدر اور دبئی کے حاکم اعلی شیخ محمد بن راشد آل مکتوم نے ملک میں قدرتی آفات اور بحرانوں کی اعلی کمیٹی کے اجلاس کے دوران کیا ہے۔آن لائن اجلاس میں دبئی کے نائب سربراہ شیخ مکتوم بن محمد بن راشد آل مکتوم بحرانوں کی اعلی کمیٹی کے سربراہ شیخ منصور بن محمد بن راشد آل مکتوم اور کمیٹی کے ارکان شریک ہوئے۔

شیخ حمدان بن محمد نے کہا  کہ اقتصادی سرگرمیوں کی بحالی کا فیصلہ ریاست کے تازہ حالات کی روشنی میں معاشی ، سماجی اور صحت اثرات کا گہرائی سے جائزہ لے کر کیا گیا ہے۔ولی عہد دبئی نے تمام سرکاری اداروں کو ہدایت دی ہے  کہ وہ مقامی شہریوں اور مقیم بیرونی افراد   سے چوبیس گھنٹے احتیاطی تدابیر پر عمل کروائیں۔ اس حوالے سے آگہی مہم پر خصوصی توجہ دیں۔

شیخ حمدان نے مزید کہا کہ ہمیں احساس ہے کہ کورونا کی وبا کے باعث عالمی بحران نے تمام شعبوں کو متاثر کیا ہے تاہم امارات کا معاشرہ ہر چیلنج پر پورا اتر کر رہے گا۔انہوں نے اطمینا ن دلایا ہے کہ ملک میں کورونا کی وبا سے نمٹنے کے لیے تمام ممکنہ سہولتیں مہیا ہیں۔ خانگی ادارے بھی تعاون کررہا ہے۔  دبئی ورلڈ کمرشل سینٹر میں فیلڈ ہسپتال تین ہزار بستروں پر مشتمل ہے۔شیخ حمدنے کہاتھا تمام سرکاری محکموں اور قانون نافذ کرنے والے اداروں سے کہاکہ وہ مختلف اقتصادی سرگرمیوں، بازاروں اور اداروں سے حفاظتی تدابیر کی پابندی کرائیں۔ بیان میں کہا گیا کہ رات گیارہ سے صبح چھ بجے تک پابندیاں برقرار رہیں گی۔