حیدرآباد: شہر حیدرآباد میں کورونا کی جانچ بڑے پیمانہ پر جاری ہے۔کسی میں بھی علامات پائی جاتی ہیں تو وہ اینٹی جن ٹسٹ کرواسکتے ہیں۔ڈسٹرکٹ میڈیکل آفیسر نے یہ بات بتائی۔انہوں نے حیدرآباد میں کورونا کی روک تھام کے لئے کئے جانے والے اقدامات سے میڈیا کو واقف کروایااور کہا کہ ہر پرائمری ہیلت سنٹرمیں اینٹی جن جانچ کے انتظامات کئے گئے ہیں۔
فی الحال 65مراکز میں ایسی جانچ کی جارہی ہے۔انہوں نے کہاکہ ہوم آئسولیشن کی سہولت نہ ہونے پر حکومت کی جانب سے آئسولیشن کی خدمات فراہم کی جارہی ہیں۔نیچر کیر آیورویدک اسپتال میں بستروں کی دستیابی کی تفصیلات سے بھی انہوں نے واقف کروایا۔انہوں نے کہاکہ شہر حیدرآباد میں فی الحال 11,705افراد کو گھروں میں الگ تھلگ رکھا گیا ہے۔انہوں نے کہاکہ اب تک 16,600افراد جو گھروں میں الگ تھلگ رکھے گئے تھے،روبہ صحت ہوگئے ہیں۔انہوں نے کہا کہ گھروں میں الگ تھلگ رکھے گئے افراد میں میڈیکل کٹس کی بھی تقسیم عمل میں لائی جارہی ہے۔
