دبئی: متحدہ عرب امارات میں شاپنگ مالزاور دفتری ٹاورز میں نماز کے لیے مخصوص ہال دوبارہ کھولے جا رہے ہیں۔میڈیا کے مطابق امارات کی ریاستوں میں پیر 20 جولائی سے نمازیوں کے لیے شاپنگ مالز اور دیگر دفتری ٹاورز کے ہال اور مخصوص کمرے دوبارہ کھول دیے جائیں گے۔ صفوں میں مناسب فاصلے کے بعد یہ گنجائش 30 فیصد نمازیوں کے لیے ہو گی۔
کورونا وائرس کے پھیلاؤ کوروکنے کےلیے مناسب اقدامات کے بعد یہ نرمی کی جا رہی ہے۔امارات کی سرکاری نیوز ایجنسی وام نےکہا ہے کہ عبادت گزاروں کودو میٹر کا جسمانی فاصلہ برقرار رکھنا چاہیے، انہیں نماز سے پہلے اور اس کے بعد جمع ہونے کی اجازت نہیں ہوگی۔
آپس میں مصافحہ کرنے سے بھی ہر صورت میں پرہیز کرنے کی ہدایات دی گئی ہیں جبکہ نماز کے لیے مخصوص جگہوں پر داخل ہونے سے قبل ماسک لگانا اور ہاتھوں کو صاف رکھنا ضروری ہے۔
وام کے مطابق اسلامی اتھارٹی برائے اسلامی اموراور نیشنل ایمرجنسی کرائسز اینڈ ڈیزاسٹرز مینجمنٹ اتھارٹی کے حوالے سے کہا گیا ہے کہ مسجد کے اندرموجود افراداگر قرآن کی تلاوت کرنا چاہیں تومکمل ایس او پیز کا خیال رکھتے ہوئے اسمارٹ فونز سمیت دیگر ذاتی الیکٹرانک آلات استعمال کریں۔وضو خانوں کو خصوصی حفاظتی انتظامات کے تحت ہر نمازی کے استعمال کے بعد سینیٹائز کیا جائے گا۔ وضو خانے مکمل سینیٹائز کر کے ہر نماز کے بعدبند کر دیے جائیں گے۔
