نئی دہلی ۔ آسٹریلیا کے سرکردہ کھلاڑی اور چینائی سوپر کنگز کے اوپنر شین واٹسن نے دعوی کیا ہے کہ ہندوستانی کرکٹ ٹیم کے سابق کپتان اور چینائی سوپر کنگز کے موجودہ کپتان مہندر سنگھ دھونی اپنی عمر کی 40 کی دہائی تک کرکٹ کھیلتے رہیں گے ۔ یہ انتخاب دھونی کا ہوگا کہ وہ آئی پی ایل کھیلیں گے یا بین الاقوامی کرکٹ۔
چینائی سوپر کنگز کے کپتان ایم ایس دھونی ایک طرف آئی پی ایل کے 13 ویں سیزن میں شرکت کے لئے زور وشور سے تیاری کر رہے ہیں اور دوسری طرف ان کے کرکٹ کیریئر کے بارے میں طرح طرح کی باتیں کی جارہی ہیں۔ ٹیم کے سی ای او نے کہا کہ انہیں امید ہے کہ وہ 2022 تک یقینی طور پر کھیلیں گے ، جبکہ اب دھونی کے ساتھی کھلاڑی اور ٹیم کے اوپنر شین واٹسن نے کہا ہے کہ دھونی کب تک کرکٹ کھیل سکتے ہیں۔
ایم ایس دھونی کی عمر 39 سال ہے لیکن شین واٹسن کا خیال ہے کہ ان کے لئے یہ صرف ایک ہندسہ ہے ۔ واٹسن کو امید ہے کہ وہ 40 کی دہائی میں بھی کھیل سکتے ہیں۔ ونڈے ورلڈ کپ کے بعد سے دھونی کرکٹ کے میدان سے دور ہیں اور وہ 19 ستمبر سے متحدہ عرب امارات میں کے میدان میں نظر آئیں گے ۔ واٹسن نے ایک انگریزی اخبار سے گفتگو کرتے ہوئے دھونی کو سدا بہارکرکٹر قرار دیتے ہوئے کہا کہ وہ اگلے چند سال میں بھی سی ایس کے کپتان کو ایکشن میں دیکھ سکیں گے لیکن وہ آئی پی ایل کھیلیں گے یا بین الاقوامی کرکٹ، یہ دھونی کا انتخاب ہے ۔
شین واٹسن نے کہا کہ وہ اب بھی کھیلنا پسند کرتے ہیں اور سدا بہار کرکٹر ہیں۔ وہ یہ نہیں سوچتے کہ وہ اس دور کے ہیں۔وہ اپنے جسم کو سنبھالنے کی پوری صلاحیت رکھتے ہیں۔ جس طرح سے وہ رنز بنانے میں مستقل طور پر اہل ہیں اور اسٹمپ کے پیچھے ان کی مہارت ناقابل یقین ہے ۔ میں ایم ایس کا ایک بہت بڑا پرستار ہوں اور ان کو مستقل طور پر کھیلتے ہوئے دیکھنا چاہتا ہوں چاہے وہ سی ایس کے کے لئے ہو یا ہندوستان کے لئے ۔
آئی پی ایل 2020 شائقین کے بغیر منعقد کیا جائے گا اور اس پر واٹسن نے کہا کہ یہ کھلاڑیوں کے لئے ایک چیلنج ہوگا کیونکہ کوئی بھی کھلاڑی اپنے اچھے کھیل کی داد چاہتا ہے ۔ جب ناظرین داد دیتے ہیں تو کھلاڑیوں کی حوصلہ افزائی ہوتی ہے ۔ متحدہ عرب امارات کی پچ پر انہوں نے کہا کہ وہاں کی وکٹ سست ہوگی اور اسپنرز کی مدد کرے گی۔ ہماری ٹیم میں اچھے اسپنر موجود ہیں اور ہم اس سے فائدہ اٹھائیں گے ۔
