لکھنو۔ سماجوادی پارٹی (ایس پی) کے صدر اکھیلیش یادو نے کہا کہ بی جے پی حکومت کا بڑبولاپن بڑھتے کورونا بحران کا سبب ہے ۔ ریاست کے عوام علاج،دوا اور آکسیجن کے لئے دردر بھٹک رہے ہیں لیکن بی جے پی حکومت غلط تشہیر اوراشتہاروں کے سہارے سبھی کو گمراہ کرنے میں مصروف ہے ۔یادو نے منگل کو جاری بیان میں کہا کہ سماجوادی بحران کے اس دور میں عوام کے ساتھ ہیں،آگے بھی رہیں گے لیکن جہاں حکومت کی کمی ہوگی اسے اجاگرکرنا بھی پارٹی کا اخلاقی اورسماجی فرض ہے ۔جمہوریت میں اپوزیشن پارٹی حکومت کی آرتی اتارنے کے لئے نہیں ہے ۔بی جے پی نے چار سال میں عوام کے مفاد میں ایک بھی قابل ذکرترقیاتی کام نہیں کیا ہے ۔ سیفئی سے گورکھ پور تک میڈیکل کے شعبہ میں جو بھی کام ہوئے وہ سبھی سماجوادی حکومت کے دور اقتدار میں ہوئے ۔
انہوں نے کہا کہ بی جے پی حکومت نے میڈیکل خدمات پرتوجہ نہ دے کرانہیں برباد کیا ہے ۔ انفیکشن کے دوسرے حملے کے زیادہ خطرناک ہونے کی ماہرین کے انتباہ کے باوجود حالات سنبھالنے کی کوشش نہیں کی گئی۔ گورکھپور اور رائے بریلی میں ایمس سماجوادی حکومت کی ہی دین ہے ۔ بی جے پی حکومت انہیں ٹھیک سے شروع بھی نہیں کرپائی۔ بھرتی نہ ہونے سے ڈاکٹروں میں اور پیرا میڈیکل عملہ کی بھاری کمی ہے ۔ بی جے پی حکومت کو اپنی کرنی پر شرم نہیں آتی ہے ۔
یادو نے کہا کہ انتخابی مہم چلانے والے چیف منسٹر کی کھوکھلی یقین دہانیوں سے تڑپ تڑپ کر ہورہی اموات کو چھپایا نہیں جاسکتا۔ بیٹا آگرہ میں اپنے والد کولے کر دوڑتا رہا ، علاج نہیں ملا۔ کانپور میں ڈیڑھ گھنٹہ تک وہ لاشیں پڑی رہیں۔ گورکھپور میں سڑک پر مریض کی موت۔ کانپور کے ایک دواخانہ میں آکسیجن ختم ، 2 ہلاک آگرہ کے ایک دواخانہ میں ، یہ کہا جارہا ہے کہ پہلے 5 سلنڈر لائیں تب ہی ہم آپ کو داخل کریں گے ۔ وینٹیلیٹر ، بھاپ مشینیں ، آکسیجن سبھی بلیک مارکیٹ میں چل رہے ہیں۔ حکومت اس پر قابو پانے میں ناکام رہی ہے ۔
انہوں نے کہا کہ ریاست میں بحران اس لئے بھی ہے کہ چیف منسٹر کی ٹیم الیون بھی کسی کام کی ثابت نہیں ہورہی ہے ۔ اس کے سارے نظام بیکار ہوچکے ہیں۔ دواخانوں اور گھر میں مریضوں کی کوئی دیکھ بھال نہیں ہے ۔ اس طرح کے پریشان حال لوگوں کی زندگیوں کے ساتھ کھلواڑکرنا غیرانسانی ہونے کی تمام حدیں پار کرگیا ہے ۔
