جموں ۔ کانگریس کے سابق سینئرلیڈر غلام نبی آزاد نے اتوار کو کہا کہ وہ جلد ہی اپنی سیاسی پارٹی کا نام دیں گے اور مکمل ریاست کی بحالی، زمین کی ملکیت کا حق اور جموں و کشمیر کے مقامی لوگوں کے لیے روزگار کا حق ان کا بنیادی ایجنڈا ہوگا۔دہلی سے ان کی آمد پر ان کا پرجوش استقبال کرنے کے بعد ایک میگا ریلی سے خطاب کرتے ہوئے آزاد نے کہا جموں و کشمیر کے لیے مکمل ریاست کا درجہ بحال کرنا، زمین کی ملکیت کا حق اور ڈومیسائل کے لیے روزگار کا حق میری پارٹی کا بنیادی ایجنڈا ہوگا۔
انہوں نے کہا کہ ایجنڈا کا دوسرا اہم نکتہ کشمیر کے پنڈتوں کی بغیر کسی مجبوری کے واپسی ہو گا۔ جو لوگ واپس آنا چاہتے ہیں انہیں رہنے کے لیے جگہ دی جائے، اس میں کوئی زبردستی نہیں ہونی چاہیے۔آزاد نے کہا مجھے خوشی ہے کہ ہمارے کشمیری پنڈت بھائیوں کے بچوں نے امریکہ، یورپ، کولکتہ اور ممبئی میں اچھی کارکردگی کا مظاہرہ کیا ہے لیکن جو لوگ واپس آنا چاہتے ہیں انہیں کشمیر میں رہنے کے لیے جگہ دی جانی چاہیے۔ آزاد نے مزید کہا کہ انسانی حقوق کی خلاف ورزی جموں و کشمیر میں ختم ہونا چاہئے۔
کشمیری پنڈت، جو وادی میں فرائض سرانجام دے رہے ہیں، ان کو نشانہ بنایا گیا ہے، یہ قتل فوری طور پر بند ہونے چاہئیں۔میں نے اس وقت کے وزیر اعظم کو وادی میں پنڈتوں کے لیے 6,000 نوکریوں کے ایک روزگار پیکج کا اعلان کرنے پر آمادہ کیا تھا، چیف منسٹر کے طور پر میرے دور میں ہم نے پنڈت نوجوانوں کو 3000 نوکریاں دی تھیں اور اس کے بعد سے حکومت باقی کو بھرنے میں کامیاب نہیں ہو سکی ہے۔
اپنی نئی پارٹی کے نام اور اس کا جھنڈا کیا ہو گا اس بارے میں بات کر تے ہوئے آزاد نے کہا کہ 1947 میں پنڈت جواہر لعل نہرو نے کہا تھا کہ ہندوستان کی جدید زبان ہندوستانی ہوگی جسے ہر ہندوستانی سمجھے گا۔انہوں نے کہا میری پارٹی اور اس کا جھنڈا اس طرح کا ہو گا کہ دیہی اور شہری دونوں علاقوں میں رہنے والے لوگ ان کو سمجھنے اور پہچاننے کے قابل ہوں۔2008 تک جموں و کشمیر کےچیف منسٹر کے طور پر اپنے ڈھائی سالہ دور حکومت کی کامیابیوں پر روشنی ڈالتے ہوئے، انہوں نے کہامیں نے وہ کام کیا جو دنیا میں پہلے کبھی نہیں ہوا تھا۔
میں نے ترقیاتی کاموں کے لئے ڈبل اور ٹرپل شفٹوں کا تصور بنایا جس کا مطلب ہے کہ ریاست کی ترقی کے ساتھ ہفتہ کے سات دن اور دن کے24 گھنٹے مشغولیت ہو۔میں نے زمین کی نشاندہی کی اور سری نگر میں ایشیا کا پہلا ٹیولپ گارڈن قائم کیا۔ اس کا افتتاح سونیا گاندھی نے کیا اور میں نے اسے اندرا گاندھی ٹیولپ گارڈن کا نام دیا۔میں نے پہلی بار جموں میں سول گولف کورس قائم کیا۔ میں نے اپنے ڈھائی سال کے مختصر دور میں 4 نئے اضلاع بنائے، نئے کالج اور ہسپتال بنائے۔اگر میں نے کم کام کیا ہے، تو میرے حریفوں کو بتائیں کہ انہوں نے اپنے دور حکومت میں کیا بہتر کیا ہے۔
وہ کہہ رہے ہیں کہ ہم تقسیم نہیں کرنا چاہتے، ہم جموں و کشمیر کو باقی ملک کے ساتھ ضم کرنا چاہتے ہیں۔ وہ ان کو ڈی ڈی سی کہہ رہے ہیں اور ملک میں کہیں بھی انہیں ڈی ڈی سی نہیں کہا جاتا ہے۔آزاد نے کہا یہ ضلع پریشد کہلاتے ہیں اور بی ڈی سی کو کنیا کماری سے لے کر ملک میں ہر جگہ بلاک سمیتی کہا جاتا ہے۔کانگریس پر اپنے ناقدین کو آڑے ہاتھوں لیتے ہوئے انہوں نے کہا کہ ہم نے اپنے خون سے کانگریس بنائی ہے، وہ ٹویٹر اور فیس بک میں مصروف ہیں، انہیں ورچوئل دنیا میں رہنے دو جب کہ میں اپنے کسانوں، مزدوروں اور دیگر عام لوگوں کے ساتھ رہوں گا۔
