دبئی ۔اوپنر عابد علی نے پاکستان کے لیے اپنے کیریئر کے پہلے ونڈے میچ میں آسٹریلیا کے خلاف نہ صرف سنچری اسکور کی بلکہ اپنے پہلے میچ میں پاکستان کی تاریخ کی طویل ترین اننگز کھیلنے والے بیٹسمین کا اعزاز بھی حاصل کرلیا۔ دبئی انٹرنیشنل کرکٹ اسٹیڈیم میں چوتھے میچ سے قبل عابد علی ایک گم نام بیٹسمین تھے، لیکن جب ہدف کے تعاقب میں مین آف دی میچ کا کردار ادا کرتے ہوئے سنچری بنائی تو وہ اسٹار بن چکے تھے۔ ان کے اس کارنامہ پر انٹرنیشنل کرکٹ کونسل (آئی سی سی) نے فوری طور پر سماجی رابطے کی ویب سائٹ ٹویٹر پر عابد علی کو مبارک باد دی۔
ونڈےکرکٹ کی تاریخ میں اپنے پہلے ہی میچ میں سنچری کرنے والے میں عابد علی کا 15 واں نمبر ہے جبکہ پاکستان کے لیے یہ کارنامہ انجام دینے والے میں تیسرا نمبر ہے۔
پاکستان کے لیے سب سے پہلے اپنے پہلے میچ میں سنچری اسکور کرنے کا اعزاز سلیم الہٰی نے 29 ستمبر 1995 کو سری لنکا کے خلاف جناح اسٹیڈیم گجرانوالا میں حاصل کیا تھا۔سلیم الہٰی نے اپنے پہلے میچ میں ناقابل شکست 102 رنز بنائے تھے اور پاکستان نے مقابلے میں کامیابی حاصل کی تھی۔
پاکستان کی جانب سے اس فہرست میں دوسری سنچری نوجوان امام الحق نے 18 اکتوبر 2017 کو ابوظہبی کے شیخ زید اسٹیڈیم میں سری لنکا کے خلاف بنائی تھی اور وہ 100 رنز مکمل کرتے ہی آؤٹ ہوگئے تھے، تاہم پاکستان نے اس میچ میں بھی کامیابی حاصل کی تھی۔
عابد علی نے آسٹریلیا جیسی عالمی چمپیئن ٹیم کے خلاف نہ صرف اپنے کیریئر کی پہلی سنچری بنائی بلکہ ایک مشکل وقت میں ٹیم کی بیٹنگ کو سنبھالا اور پہلے میچ میں پاکستان کی جانب سے سب سے زیادہ رنز بنانے کا ریکارڈ بنا دیا۔عابد علی کی 112 رنز کی تاریخی اننگز میں 9 چوکے شامل تھے اور انہوں نے 119 گیندوں کا سامنا کیا۔خیال رہے کہ ونڈےکرکٹ کی تاریخ میں اپنے پہلے میچ میں طویل ترین اننگز کھیلنے کا اعزاز ویسٹ انڈیز کے سابق عظیم بلے باز ڈیسمنڈ ہائنیس کا ہے جنہوں نے 22 فروری 1978 کو آسٹریلیا کے خلاف سینٹ جونز انٹیگا میں 148 رنز بنائے تھے۔
