کولمبو ۔ سری لنکا میں ایسٹر کے موقع پر ہوئے سلسلہ وار بم دھماکوں کے الزام میں اب تک 13 افراد کو گرفتار کیا جا چکا ہے۔ان دھماکوں میں تقریباً 290 افراد ہلاک اور 500 افراد زخمی ہوئے ہیں، دھماکوں میں عیسائی عبادت گاہوں اور ہوٹلوں کو نشانہ بنایا گیا ہے۔
سری لنکائی حکام نے بم دھماکوں کے فوراً عاید مختصر کرفیو پیر کی صبح برخاست کردیا ہے تاہم ہنوزکسی بھی گروہ یا تنظیم نے ان منظم دھماکوں کی ذمہ داری قبول نہیں کی۔دھماکوں کے بعد مذہب کی بنیاد پر فسادات کا خطرہ پیدا ہوگیا تھا، پولیس کے مطابق اتوار کی رات کو شمال مغربی علاقے میں ایک مسجد پر پیٹرول بم حملہ کیا گیا جبکہ مسلمان افراد کی 2 دکانوں کو آگ لگانے کی کوشش کی گئی۔
دوسری جانب سری لنکا کے وزیراعظم رانیل وکراما سنگھے نے تصدیق کی ہے کہ حکومت کو پہلے ہی ایک غیر معروف مسلمان گروہ کی جانب سے عیسائی عبادت گاہوں پر متوقع حملے کی اطلاع مل گئی تھی لیکن ان کے وزرا نے انہیں اس کے متعلق آگاہ نہیں کیا۔
پولیس ذرائع نے فرانسیسی خبررساں ادارے سے کہا کہ کولمبو میں 2 مقامات سے اب تک 13 افراد کو حراست میں لیا جاچکا ہے تاہم انہوں نے مزید تفصیلات نہ بتاتے ہوئے صرف اتنا کہا کہ گرفتار ملزمان کا تعلق ایک ہی گروہ سے ہے۔انہوں نے یہ بھی کہا کہ 8 میں سے کم از کم 2 دھماکے خودکش تھے جبکہ ایک مکان پر چھاپہ مار کر دھماکا خیز مواد ناکارہ بنانے کی کوشش میں بھی 3 پولیس عہدیدار ہلاک ہوئے۔
سلسلہ واردھماکوں کے نتیجے میں ہلاک ہونے والوں میں 32 غیر ملکی شامل ہیں جن میں 5 ہندوستانی، 3 برطانوی، 2 ترکی اور ایک پرتگال کا شہری ہےجبکہ 2 افراد کے پاس برطانیہ اور امریکہ دونوں ممالک کا پاسپورٹ ہے۔ سری لنکا کے دفتر خارجہ کے حکام کے بموجب 9 بیرونی افراد کے لاپتہ ہونے کی اطلاعات ہیں تاہم 25 ایسے افراد کی لاشیں بھی موجود ہیں جن کی اب تک شناخت نہیں ہوسکی اور ممکنہ طور پر وہ بیرونی ممالک کے باشندے ہیں۔
