ممبئی ۔ دہشت گردوں کے خلاف لڑتے ہوئے ملک کے لیے اپنی جان قربان کردینے والے شہید ہیمنت کرکرے سے متعلق سادھوی پرگیہ سنگھ ٹھاکر کے متعصب بیانات پر ہنگامہ ہنوز جاری ہے اور ملک سے محبت کرنے والے ہر ہندوستانی کی جانب سے سادھوی پر شدید تنقید کی جارہی ہے ۔ ہیمنت کرکرے کی شہادت کے 11 سال بعد بھوپال سے بی جے پی امیدوار پرگیہ ٹھاکر نے حالیہ بیان میں کہا ہے کہ ہیمنت کرکرے کی موت ان کی بددعاء سے ہوئی ہے۔ بی جے پی پر نہ صرف شہیدوں کے نام پر سیاست کرنے کا الزام لگا بلکہ انھیں غدار وطن کہنے پر بھی شدید تنقیدکی جارہی ہے ۔
شہید ہیمنت کرکرے کے افراد خاندان نے پرگیہ ٹھاکر کے بیان پر اپنا رد عمل ظاہر کیا ہے۔ ان کی بیٹی جوئی کرکرے نے کہا کہ شہید کو ذلیل کرنے والے لوگوں کی کوئی بھی سازش کامیاب نہیں ہوگی۔ ایک انٹرویو میں انھوں نے کہا کہ ہیمنت کرکرے کی شہادت پر سیاست درست ہے یا غلط، اس کا فیصلہ وہ عوام پر چھوڑتی ہیں کیونکہ عوام سمجھدار ہیں اور وہی اپنے ووٹ کی طاقت سے پرگیہ کو جواب دیں گے۔
شہید ہیمنت کرکرے کی بیٹی جوئی نے پرگیہ ٹھاکر کے بیان پر بہت زیادہ تبصرہ کرنے سے انکار کر دیا ہے۔ انھوں نے کہا کہ والد کی شہادت کے بعد کچھ قائدین انتخابی فائدے کے لیے قابل اعتراض بیان دے رہے ہیں۔ ایسے قائدین سے مجھے کچھ نہیں کہنا، کیونکہ وہ سمجھیں گے بھی نہیں اور میں ایسے لوگوں پر بول کر انھیں اہمیت بھی نہیں دینا چاہتی۔ جوئی نے اپنی ماں کی لکھی نظم کا تذکرہ کرتے ہوئے کہا کہ میرے شوہر کے شہید ہونے کا مجھے غم ضرور ہے، افسوس نہیں…پھر بھی کچھ سوال دل میں آتے ہیں، پر جواب مل نہیں پاتے۔ پھر من کہتا ہے، پاگل تو کس سے سوال کرتا ہے؟ مالیگاؤں بم بلاسٹ کی میرے شوہر نے جانچ پوری کی ہے… کرکرے، کامٹے اور سالسکر شہید ہوئے، اب تو بھارت ماتا کی راجنیتی ہے۔ جوئی کرکرے نے کہا کہ ماں کہتی تھیں کہ ہیمنت کی شہادت پر کچھ لوگوں نے تو یہ بھی کہا کہ ان کے شوہر کو ہیروگیری کا شوق تھا، اس لیے ایسا ہوا۔ لیکن میرا کہنا ہے کہ یہی ان کی حب الوطنی کی نشانی ہے۔ پرگیہ ٹھاکر کا نام لیے بغیر جوئی سوال کرتی ہیں کہ آخر وہ کس کے لیے ایسا بول رہی ہیں؟ اپنے لوگوں کے لیے جنھوں نے ملک کے لیے قربانی دی ہے۔
