نئی دہلی ۔ سپریم کورٹ مرکزی وزیر اجے مشرا کے بیٹے اور لکھیم پور کھیری تشددمقدمہ کے اہم ملزم آشیش مشرا کی ضمانت منسوخ کرنے کی درخواست پر پیر کو اپنا فیصلہ سنائے گی۔چیف جسٹس این وی رمنا، جسٹس سوریہ کانت اور جسٹس ہیما کوہلی کی بنچ پیر کی صبح 10.30 بجے فیصلہ سنائے گی۔
عدالت نے 4 اپریل کو آشیش مشرا کی ضمانت منسوخ کرنے کی مانگ کرنے والے کسانوں کی عرضی پر اپنا حکم محفوظ کر لیا تھا۔اس سے پہلے عدالت نے آشیش مشرا کی ضمانت کی درخواست کی اجازت دینے والے الہ آباد ہائی کورٹ کے حکم پر سوال اٹھایا تھا اور مشاہدہ کیا تھا کہ جب مقدمہ کی سماعت شروع ہونا باقی ہے، پوسٹ مارٹم رپورٹ اور زخموں کی نوعیت جیسے غیر ضروری غور و فکر کو مدنظر نہیں رکھا جانا چاہیے۔
خصوصی بنچ نے اس حقیقت کا سخت نوٹس لیا تھا کہ ریاستی حکومت نے ہائی کورٹ کے حکم کے خلاف درخواست دائر نہیں کی جیسا کہ عدالت کی طرف سے مقرر کردہ خصوصی تفتیشی ٹیم (ایس آئی ٹی ) نے تجویز کیا تھا۔کسانوں کی طرف سے پیش ہونے والے سینئر وکیل دشینت ڈیو اور پرشانت بھوشن نے دلیل دی کہ ہائی کورٹ نے جامع چارج شیٹ پر غور نہیں کیا بلکہ ایف آئی آر پر انحصار کیا۔
سینئر وکیل مہیش جیٹھ ملانی نے ریاست کی طرف سے پیش ہوتے ہوئے کہا کہ ملزم کے ملک سے باہر جانے کا امکان نہیں ہے اور اس کا کوئی مجرمانہ پس منظر نہیں ہے۔
سپریم کورٹ نے 16 مارچ کو ہائی کورٹ کے فیصلے کو چیلنج کرنے والی ایک عرضی پر اتر پردیش حکومت اور آشیش مشرا سے جواب طلب کیا تھا۔ بنچ نے اتر پردیش حکومت کو گواہوں کی حفاظت کو یقینی بنانے کی بھی ہدایت دی تھی۔ اس سے قبل کسانوں کے لیے پیش ہونے والے وکیل نے 10 مارچ کو ایک اہم گواہ پر حملے کا حوالہ دیا تھا۔یادر ہے کہ اتر پردیش کے لکھیم پور کھیری تشدد میں مارے گئے کسانوں کے خاندانوں کے ارکان نے آشیش مشرا کو ضمانت دینے کے ہائی کورٹ کے حکم کو سپریم کورٹ میں چیلنج کیا ہے۔
