لکھنؤ۔ اترپردیش میں اسمبلی انتخابات کے چھٹے مرحلے کے لیے رائے دہی شروع ہو گئی ہے جس میں دس اضلاع میں پھیلے ہوئے 57 اسمبلی حلقوں میں پولنگ ہو رہی ہے۔جن اضلاع میں جمعرات کو رائے دہی ہو رہی ہے وہ ہیں امبیڈکر نگر، بلرام پور، سدھارتھ نگر، بستی، سنت کبیر نگر، مہاراج گنج، گورکھپور، کشی نگر، دیوریا اور بلیا۔اس مرحلے میں، انتخابات چیف منسٹر یوگی آدتیہ ناتھ، یوپی کانگریس کے صدر اجے کمار للو اور سابق وزیر سوامی پرساد موریہ جیسے سیاسی بڑے لیڈروں کی قسمت پر مہر لگائیں گے۔
یہ 57 اسمبلی حلقے جن میں سے 11 محفوظ ہیں، بی جے پی کے لیے کافی اہم ہیں۔2017 کے اسمبلی انتخابات میں اس نے 57 میں سے 46 سیٹیں جیتی تھیں۔
اس بار انتخابی میدان میں 676 امیدواروں میں گورکھپور سے یوگی آدتیہ ناتھ بھی شامل ہیں۔ وہ اپنا پہلا اسمبلی انتخاب لڑ رہے ہیں۔سماج وادی پارٹی نے بی جے پی کے سابق لیڈر آنجہانی اوپیندر دت شکلا کی بیوہ کو آدتیہ ناتھ کے خلاف کھڑاکیا ہے۔ آزاد سماج پارٹی کے بانی چندرشیکھر آزاد بھی وزیر اعلیٰ کے خلاف الیکشن لڑرہے ہیں۔تمکوہی راج سیٹ سے یو پی سی سی کے صدر اجے کمار للو اور فاضل نگر سے سماج وادی پارٹی میں شامل ہونے کے لیے بی جے پی کے وزیر کا عہدہ چھوڑنے والے سوامی پرساد موریہ اس مرحلے میں دیگر نمایاں امیدوار ہیں۔
سبکدوش ہونے والی اسمبلی میں اپوزیشن لیڈر اور سماج وادی پارٹی کے لیڈر رام گووند چودھری بنسڈیہ سے انتخاب لڑرہے ہیں۔ اس مرحلے میں کئی موجودہ وزراء کی انتخابی قسمت کا فیصلہ بھی ہوگا۔ان میں پتھر دیوا سیٹ سے سوریہ پرتاپ شاہی، اٹوا سے ستیش چندر دویدی، بنسی سے جئے پرتاپ سنگھ، کھجانی سے شری رام چوہان اور رودر پور سے جئے پرکاش نشاد شامل ہیں۔سریندر سنگھ، موجودہ ایم ایل اے جو وکاسیل انسان پارٹی (وی آئی پی ) میں شامل ہوئے بی جے پی کی طرف سے ٹکٹ دینے سے انکار کے بعد، بلیا کے بیریا سے بی جے پی کے وزیر آنند سوروپ شکلا کو چیلنج کر رہے ہیں۔
اس مرحلے میں انتخابی مہم میں سیاسی پارٹیوں کو ایک دوسرے پرہر طرح سے تنقیدیں کرنے کا مشاہدہ کیا گیا۔وزیر اعظم نریندر مودی نے بی جے پی کے حریفوں کو پرواروادی (کٹر خاندانی) کے طورپر ظاہر کرتے ہوئے ان پر تنقید کیا تھا، جو انہوں نے دعوی کیا کہ وہ کبھی بھی ہندوستان کو قابل یا اتر پردیش کو بااختیار نہیں بنا سکتے ہیں۔کانگریس جنرل سکریٹری پرینکا گاندھی نے یہ کہتے ہوئے مسترد کیا کہ بی جے پی صرف ان کے خاندان کے خلاف ہے، جو زعفرانی پارٹی کے سامنے نہیں جھکی ہے۔سماج وادی پارٹی کے سربراہ اکھلیش یادو نے بی جے پی پر تحفظات ختم کرنے اور سرکاری اداروں کو خانگی ہاتھوں کو بیچنے کی سازش کا الزام لگایا ہے۔
دریں اثنا، اس مرحلے میں کل 2.14 کروڑ سے زیادہ ووٹر ہیں۔یوپی اسمبلی انتخابات کے چھٹے مرحلے میں آزادانہ اور منصفانہ رائے دہی کے لیے مرکزی نیم فوجی دستوں اور ریاستی مسلح پولیس کی 868 سے زیادہ کمپنیاں، 1.27 لاکھ سے زیادہ سول پولیس ، ہوم گارڈز اور پرانتیا رکشک دل (پی آر ڈی) کے جوانوں اور گاؤں کے محافظوں کو تعینات کیا گیا ہے۔
