افغانستان کی بنگلہ دیش کے خلاف تاریخی کامیابی، راشد خان مین آف دی میچ

چٹگانگ ۔افغانستان نے کپتان راشد خان کی تباہ کن بولنگ کی بدولت ٹیم نے واحد ٹسٹ میچ میں بنگلہ دیش کو 224 رنز سے شکست دے کر نئی تاریخ رقم کی اور ٹسٹ کرکٹ میں اپنی دوسری کامیابی حاصل کر لی۔ افغانستان کو ٹسٹ کے آخری دن میزبان ٹیم کی 4 وکٹیں درکار تھیں لیکن چوتھے بارش کی وجہ سے مقابلے میں صرف18.3 اوورس کا کھیل ممکن تھا جس کا پورا فائدہ اٹھاتے ہوئے صرف 2 ٹسٹ مقابلوں کا تجربہ رکھنے والی افغانستان نے تاریخی کامیابی حاصل کی ۔
چٹگانگ میں کھیلے گئے واحد ٹسٹ میچ میں افغانستان نے ٹاس جیت کر پہلے بیٹنگ کا فیصلہ کیا اور رحمت شاہ کی سنچری کے علاوہ اصغر افغان اور راشد خان کی نصف سنچریوں کی بدولت پہلی اننگز میں 342 رنز کا مجموعہ اسکور بنایا۔بنگلہ دیش کی ٹیم مومن الحق کی نصف سنچری اور مصدق حسین کے 48رنز کے باوجود پہلی اننگز میں صرف 205 رنز بنا کر آو¿ٹ ہو گئی اور مہمان ٹیم نے 137 رنز کی اہم برتری حاصل کی۔دوسری اننگز میں ابراہیم زدران اور اصغر افغان نصف سنچریوں کے علاوہ افسر زازئی کے 48 رنز کی بدولت افغان ٹیم 260 رنز بنانے میں کامیاب رہی اور بنگلہ دیش کو فتح کے لیے 398رنز کا مشکل ہدف دیا۔
ہدف کے تعاقب میں بنگلہ دیش کی ٹیم مشکلات سے دوچار نظر آئی اور چوتھے دن کے اختتام پر 136 رنز پر 6 وکٹیں گنوا کر شکست کے دہانے پر پہنچ گئی تھی لیکن کپتان شکیب الحسن آخری امید کی شکل میں وکٹ پر موجود تھے۔میچ کی صبح ایسا محسوس ہوتا تھا کہ افغانستان کی ٹیم کو بنگلہ دیش کی بساط لپیٹنے میں زیادہ دیر نہ لگے گی لیکن اس موقع پر بارش بنگلہ دیش کی مدد کو آ گئی اور میچ تاخیر سے شروع ہوا۔
ابھی چند اوورزکا کھیل ہی ہوا تھا کہ ایک مرتبہ پھر بارش نے مداخلت کردی اور چائے کے وقفے تک کھیل دوبارہ شروع نہ ہو سکا جس کے بعد میچ ڈرا ہونے کے امکانات روشن ہو گئے۔بارش اور گیلے گراو¿نڈ کے بعد میچ پیر کی دوپہر دوبارہ شروع ہوا تو افغانستان کے کپتان راشد خان نے شاندار بولنگ کا مظاہرہ کرتے ہوئے ڈرا کی جانب گامزن میچ میں اپنی ٹیم کو فتح سے ہمکنار کرا دیا۔افغانستان کو ابتدا میں ہی اس وقت کامیابی ملی جب شکیب 44 رنز بنانے کے بعد ظاہر خان کی وکٹ بن گئے۔
اس کے بعد مہدی حسن میراز اور سومیا سرکار نے کچھ دیر تک مزاحمت کی لیکن راشد کی نپی تلی بولنگ کے سامنے ان کی ایک نہ چلی اور میچ کے اختتام سے محض 4اوورز قبل پوری بنگلہ دیشی ٹیم 173رنز پر ڈھیر ہو گئی۔
افغانستان کی جانب سے پہلی اننگز میں 5 وکٹیں لینے والے راشد خان نے دوسری اننگز میں بھی بہترین بولنگ پیش کرتے ہوئے 6 وکٹیں لے کر میچ میں مجموعی طور پر 11وکٹیں لیں۔جس پر انہیں مین آف دی میچ قرار دیا گیا۔یہ افغانستان کی ٹسٹ کرکٹ کی تاریخ میں دوسری کامیابی ہے اور واحد ٹسٹ میچ ہونے کی بدولت انہوں نے سیریز جیتنے کا بھی اعزاز حاصل کر لیا۔