ابوظہبی: ابوظہبی کےخانگی اسکولوں نے زیادہ سے زیادہ طلبہ کو اپنی جانب راغب کرنے کے لیے 30 فیصد تک رجسٹریشن فیس اور آن لائن تعلیم کی صورت میں 50فیصد تک فیس کم کرنے کی پیش کش کی ہے۔ میڈیا کے مطابق ابوظہبی میں ایک اسکول کے پرنسپل نے کہا کہ نئے تعلیمی سال میں طلبہ کی تعداد کم ہے۔ خصوصا نرسری میں داخلے نہیں لیے جارہے ہیں۔ نئے داخلوں کے مقابلے میں مختلف اسکولوں سے طلبہ کے منتقلی کے معاملات بڑھ رہے ہیں۔ بہت سارے طلبہ کے والدین نرسری میں بچوں کو داخل کروانے سے خوفزدہ ہیں۔
ایک اور رجحان یہ سامنے آرہا ہے کہ والدین اپنے بڑے بچوں کو ایسے اسکولوں میں داخلہ دلانے کی کوشش میں لگ گئے ہیں جہاں فیس کم ہوں۔ خانگی اسکولوں نے داخلہ لینے والے طلبہ کے لیے سوشل میڈیا پر مختلف ترغیباتی پیکجز کی تشہیر شروع کی ہے۔ سرپرستوں سے کہا جا رہا ہے کہ اگر اسکول میں بھائی اور رشتہ دار داخلہ لیں گے تو انہیں خصوصی رعایت دی جائے گی۔ رجسٹریشن فیس معاف کردی جائے گی۔ تعلیمی فیس میں رعایت دی جائے گی اور تعلیم مکمل آن لائن ہونے کی صورت میں مزید رعایتیں پیش کی جائیں گی۔
ابوظہبی اور العین کے اسکولوں نے جو ابوظہبی کی وزارت تعلیم، امریکہ، برطانیہ اور ہندوستان کے کورسز پڑھا رہے ہیں اشتہار دے کر طلبہ کے رشتہ داروں سے کہا ہے کہ وہ جلد از جلد بچوں کی رجسٹریشن کرائیں اور 30 تا 50 فیصد تک تعلیمی فیس میں رعایت حاصل کریں۔ ان سکولوں نے ٹرانسپورٹ فیس میں 25 فیصد تک کمی کی بات بھی کہی ہے۔ اسکولوں کے اشتہارات میں یہ بھی کہا جا رہا ہے کہ ہمارے یہاں اساتذہ ایسے ہوں گے جن کی مادری زبان انگریزی ہوگی۔
ابوظہبی میں برٹش کورسز پڑھانے والے ایک مشہور اسکول نے تعلیمی فیس میں 50فیصد رعایت کا وعدہ کیا ہے۔ یہ رعایت اسکول کی خاص مرکز کے طلبہ کے لیے ہوگی۔ ایک اور اسکول نے نئے طلبہ کے لیے فیس میں 20 فیصد کمی کی بات کہی ہے جبکہ اسکول میں ایک سے زیادہ بھائیوں کے داخلے پر15 فیصد مزید رعایت کا وعدہ کیا گیا ہے۔
