نئی دہلی ۔امریکہ جانے کا خواب ہر نواجوان اپنی آنکھوں میں سجاتا ہے اور امریکہ پہنچنے کےلئے کوئی سخت محنت کا راستہ اختیار کرتا ہے تو کوئی اثررسوخ تلاش کرنے لگتا ہے لیکن جن کے پاس یہ دونوں راستے آسان دستیاب نہیں ہوتے وہ غلط راہ اختیار کرتے ہوئے امریکہ جانے کی کوشش کرتے ہیں لیکن وہ امریکہ تو نہیں پہنچتے بلکہ جیل کی سلاخوں کے پیچھے پہنچ جاتے ہیں ایسا ہی ایک واقعہ دہلی میں پیش آیا جہاں ایک نوجوان 80 کا بوڑھا بن کر امریکہ جانے کی کوشش کررہا تھا جسے گرفتار کرلیا گیا ۔
32 سالہ شخص نے ایک 81 سالہ بوڑھے فرد کا متاثر کن بہروپ بدلا اور پھر جعلی پاسپورٹ پر امریکہ جانے کی کوشش کی۔تفصیلات کے مطابق یہ واقعہ دارالحکومت نئی دہلی کے مصروف ترین اندرا گاندھی انٹرنیشنل ایرپورٹ پر پیش آیا جہاں جیش پٹیل نامی شخص عملے کی توجہ کا مرکز بن گیا۔
سینٹرل انڈسٹریل سیکیورٹی فورس (سی آئی ایس ایف) کے ایک عہدیدار سکرانت کشور نے کہا کہ یہ شخص خود کو بہت زیادہ معمر اور معذور ظاہر کیا، جب اس سے وہیل چیئر سے کھڑا ہونے کا کہا گیا تو پٹیل کا جواب تھا کہ وہ کھڑا نہیں ہوسکتا، جب پوچھا گیا کہ کیا وہ مدد کے ساتھ کھڑا ہوسکتا ہے، تو بادل نخواستہ کھڑا ہوا۔
یہ وہ موقع تھا جب عملے کو محسوس ہوا کہ مسافر کی داڑھی اور بال تو سفید ہیں لیکن ان کی جڑیں سیاہ ہیں، جبکہ عملے کی نظروں سے بچنے کے لیے اس نے تیز چلنا بھی شروع کردیا۔یہ رات گئے نیویارک جانے والی پرواز میں سوار ہونا چاہتا تھا اور جب اس سے دستاویزات طلب کی گئیں تو اس نے جو پاسپورٹ دیا، اس کے مطابق اس کا نام امریک سنگھ تھا جبکہ پیدائش فروری 1938 کی درج تھی، یعنی 81 سال عمر ظاہر کی جارہی تھی۔
تاہم سکرانت کشور کے مطابق وہ کسی بھی طرح 80 سال کا دیکھائی نہیں دے رہا تھا، اس کی جلد جوان فرد جیسی تھی۔سی آئی ایس ایف کے ایک اور عہدیدار ہرمیندر سنگھ کے مطابق اس شخص نے ابتدائی سیکیورٹی چیک کو دھوکہ دے دیا تھا اور امیگریشن کلیئر کردیا گیا تھا ۔سی آئی ایس ایف کو شک ہوا کہ اس کی آواز عمر سے مطابقت نہیں رکھتی، جبکہ سفید بالوں کے برعکس اس کی جلد سے وہ جوان لگ رہا تھا جبکہ چہرے پر کسی قسم کی جھریاں بھی موجود نہیں تھیں۔
اس کے بعد جب مزید پوچھ گچھ کی گئی تو اس نے بوڑھے شخص کا بہروپ بدلنے اور جعلی پاسپورٹ کے استعمال کا اعتراف کرلیا اور بتایا کہ وہ ریاست گجرات کا رہنے والا ہے۔چونکہ اس کے پاس جعلی پاسپورٹ تھا تو اسے حراست میں لے کر امیگریشن حکام کے حوالے کردیا گیا۔
دہلی پولیس کے حوالے سے بتایا گیا کہ یہ شخص امریکہ ملازمت کے لیے جانا جاتا تھا، جس کے لیے اس نے داڑھی بڑھائی اور پھر بالوں کو سفید رنگ سے ڈائی کرلیا پھر اس نے موٹے چشمے اور پگڑی کو پہن لیا، جبکہ وہ ایک معمر شخص کی طرح چلنے کی بھی کوشش کرتا رہا۔ان تمام کوششوں کے باوجود وہ ایر پورٹ حکام کو دھوکہ دینے میں ناکام رہا اور اسے گرفتار کرتے ہوئے پولیس کے حوالے کردیا گیا ہے۔
