نئی دہلی۔ شمال مشرقی دہلی میں شہریت ترمیمی قانون کی مخالفت اور حمایت کرنے والوں میں آج پھر تصادم ہوا اور ایک دوسرے پر پتھراو ¿ کے واقعات کے دوران جعفرآباد اور موج پور علاقوں میں کم سے کم دومکانات اور ایک دمکل گاڑی کو آگ لگا دینے کی اطلاع ملی ہے۔ دہلی کے گوکل پوری تھانہ علاقے کے موج پورعلاقے میں جاری احتجاجی مظاہرہ کے درمیان پتھر بازی میں زخمی ہوئے ایک پولیس کانسٹبل کی موت ہو گئی۔ مہلوک پولیس عہدیدار کی شناخت ہیڈ کانسٹبل رتن لال کے طور پر ہوئی ہے۔ وہیں شاہدرہ کے ڈی سی پی امت شرما کے بھی زخمی ہونے کی خبر ہے۔
ایک سے زیادہ ذرائع ابلاغ کی اطلاعات کے مطابق صورتحال پر قابو پانے کیلئے نیم فوجی دستوںکو طلب کرلیا گیا ہے۔ حالات کی شدت کے پیش نظر دہلی میٹرو نے جعفرآباد اور موج پور۔ بابر پور اسٹیشنوںکو بندکردیا ہے۔ ان اسٹیشنوں پر ٹرینیں نہیں روکی جائیں گی۔
چاند باغ میں بھی تشدد برپا ہونے کی اطلاع ملی ہے جوجعفرآباد کا علاقہ ہے۔ پولیس نے مظاہرین کو منتشر کرنے کے لئے مبینہ طور پر آنسوگیس کے گولے داغے اور لاٹھی چارج کیا۔ جعفرآباد کے قریب کل شام سے ہی حالات کشیدہ تھے جہاں ترمیم شدہ شہریت قانون کی مخالفت اور حمایت کرنے والوں کے مابین جھڑپیں شروع ہو گئی تھیں۔
