شارجہ: آئی پی ایل 2020 میں سرفہرست دفاعی چمپئن ممبئی انڈینس اور سن رائزرس حیدرآباد کے درمیان اتوار کو ہونے والے میچ میں زبردست مقابلہ متوقع ہے جیسا کہ دونوں ٹیمیں چار میچوں میں دو فتوحات اور دو ناکامیوں کے بعد فی کس 4 پوائنٹس حاصل کرچکی ہے لیکن ممبئی پہلے اور رائزرس حیدرآباد چوتھے نمبر پر ہے ۔
دونوں ٹیموں نے اپنے گزشتہ دونوں مقابلوں میں فتوحات حاصل کی ہیں اور شارجہ کے اس میدان پر اتر رہی ہیں جہاں اب تک بڑے اسکور بنے ہیں۔ دونوں ٹیموں کا شارجہ کے میدان میں یہ پہلا میچ ہوگا۔ شارجہ میں اب تک چار اننگز میں 200 سے زیادہ رنز بن چکے ہیں۔ دونوں ٹیموں کے پاس ایسے بیٹسمینس موجود ہیں جو بڑا اسکور بنانے کی صلاحیت رکھتے ہیں۔
ممبئی نے اپنے پچھلے میچ میں کپتان روہت شرما(70) ، کیرون پولارڈ (ناٹ آؤٹ 47) اور ہاردک پانڈیا کی جارحانہ اننگز کی بدولت کنگز الیون پنجاب کو48 رنز سے شکست دی تھی۔ ممبئی نے آخری پانچ اووروں میں89 رنزبناکر191 رنزکا بڑا اسکور بنایا تھاجس کے بعد حیدرآباد کے کپتان ڈیوڈ وارنر کے لئے سخت چیلنج ہوگا۔ حیدرآباد کے لئے فکر کی با ت یہ ہے کہ ٹیم کے فاسٹ بولر بھونیشور کمار زخمی ہیں جوگزشتہ میچ میں اپنا آخری اوور مکمل نہیں کرسکے تھے ۔ ابھی تک یہ واضح نہیں ہے کہ بھونیشور اتوار کے میچ میں ٹیم کا حصہ ہوں گے یا نہیں۔
وارنر کے لئے راحت کی بات یہ ہے کہ بھونیشور کے زخمی ہونے کے باجود ان کی ٹیم نے چینائی کو 7 رنز سے شکست دی ہے اور اس کامیابی میں نوجوان بیٹسمین پریم گرگ نے ناٹ آوٹ51 رنز بناکر شاندار مظاہرہ کیا ۔ وارنر کامیابی کے اس سلسلے کو آگے بھی برقرار رکھنی کی کوشش کریں گے لیکن شارجہ میں ٹیم کو ممبئی کے بہترین بیٹسمینوں پر قابو پانا ہوگا۔
