ریاض۔ کورونا وائرس کے پھیلاؤ کو روکنے کے لئے سعودی عرب کی جانب سے عاید کی جانے والی پابندی کے باعث مملکت میں رہ جانے والے عمرہ زائرین کی واپسی کا عمل شروع ہو گیا ہے۔جدہ کے کنگ عبدالعزیز انٹرنیشنل ایرپورٹ پر تعینات محکمہ پاسپورٹ کے حکام نے سفری پابندیوں کے باعث رک جانے والے عمرہ زائرین کی واپسی کےلیے امیگریشن کی کارروائی کی ہے۔
سعودی خبررساں ادارے ایس پی اے کے مطابق پاسپورٹ حکام نے ان عمرہ زائرین کی وطن واپسی کے لیے امیگریشن کی کارروائی نمٹائی ہے جن کے عمرہ ویزے ختم ہوگئے تھے۔ یہ کارروائی وزارت حج و عمرہ کے آن لائن ریکارڈ کو سامنے رکھ کر کی گئی۔ یاد رہے کہ سعودی قانون کے مطابق عمرہ ویزے کی میعاد سے زائد قیام پر جرمانے اور سزائیں مقرر ہیں جبکہ ایسے افراد کو بلیک لسٹ بھی کردیا جاتا ہے۔ شاہی فرامین جاری کرکے ان عمرہ زائرین جو رک گئے تھے جرمانے اور قید کی سزاؤں سے استثنی دیا گیا ۔عمرہ زائرین کی وطن واپسی کے تمام انتظامات نگراں کمیٹی کی سرپرستی میں انجام دیے گئے۔
محکمہ پاسپورٹ نے اپنے بیان میں کہا ہے کہ وزارت حج وعمرہ، وزارت صحت ، شہری ہوابازی اورکنگ عبدالعزیزایرپورٹ جدہ کے حکام کے تعاون سے وطن واپس جانے والے عمرہ زائرین کا ایر پورٹ پرخیر مقدم کیا گیا جبکہ نئے کورونا وائرس کے پھیلاؤ کو روکنے والی احتیاطی تدابیر پر بھی عمل کیا گیا۔
