ریاض: سعودی جنرل اتھارٹی فار ملٹری انڈسٹری نے کہا ہے کہ 6 مارچ 2022 کو دارالحکومت ریاض میں پہلی بار بین الاقوامی دفاعی نمائش منعقد کی جائے گی۔اس میں فضائی، بری، بحری ڈیفنس سسٹم، مصنوعی سیارے اور انفرمیشن سیکیورٹی آلات رکھے جائیں گے۔
میڈیا کے مطابق یہ نمائش اپنی نوعیت کی پہلی منفرد اور مکمل ہوگی۔ اس میں سعودی اور بین الاقوامی اسلحہ ساز وں کے علاوہ فوجی اور سیکیورٹی آلات تیار کرنے والے ادارے شامل ہوں گے۔یہ جلد ہی دنیا بھر میں ہونے والی بین الاقوامی دفاعی نمائشوں میں اپنا مقام بنالے گی۔
جنرل اتھارٹی فار ملٹری انڈسٹری کے گورنر انجنیئراحمد العوہلی نے وڈیو پریس کانفرنس میں کہا کہ دفاعی نمائش ہردو برس بعد ریاض میں ہو گی۔ پریس کانفرنس میں سعودی ، علاقائی اور بین الاقوامی میڈیا کے نمائندے، عسکری صنعتوں سے تعلق رکھنے والی سعودی اور بین الاقوامی بڑی کمپنیوں کے عہدیدار موجود تھے۔
العوہلی نے مزید کہا ہے کہ ٹیکنالوجی ترقی کے زمانے میں دفاع کا بین الاقوامی شعبہ پیچیدہ سے پیچیدہ تر ہوتا چلا جارہا ہے۔ ضرورت اس بات کی ہے کہ اس شعبے سے تعلق رکھنے والے تمام ادارے ایک پلیٹ فارم پر ایک چھت کے نیچے جمع ہوں اور دنیا بھر کو درپیش دفاعی چیلنجوں پر مباحثہ کریں۔
انہوں نے مزید کہا کہ نمائش کے موقع پر متعدد سیمینار اور کانفرنسیں بھی ہوں گی۔ 30 ہزار مربع میٹر کے رقبے پر داخلی نمائش ہال ہوں گے۔ 15 ہزار مربع میٹر کے رقبے پر طیارے کھڑے کیے جائیں گے۔ دولاکھ مربع میٹر کا رقبہ بری آلات کے لیے مختص ہوگا۔
