سچن کی ورلڈ کپ ٹیم میں دھونی کی عدم شمولیت،کوہلی بھی کپتان نہیں

نئی دہلی۔ ہندوستانی کرکٹ ٹیم کے سابق ماسٹر بلاسٹر اورکپتان سچن تنڈولکر نے ورلڈ کپ کے اختتام کے بعد اپنی11 رکنی ٹیم کا انتخاب کیا ہے جس میں انگلش وکٹ کیپر جانی بیرسٹوکو ہندوستانی سابق کپتان اور وکٹ کیپر مہندر سنگھ دھونی پر ترجیح دی گئی –

اسی طرح قیادت کے معاملہ میں بھی ویراٹ کوہلی بھی پہلی پسند نہیں رہے بلکہ سچن نے نیوزی لینڈ کے کپتان کین ولیمسن کو ہی اپنا کپتان بنایا ہے۔ سچن تنڈولکر نے اپنی 11 رکنی ورلڈ ٹیم میں پانچ ہندوستانی کھلاڑیوں کو منتخب کیا ہے جس میں ویراٹ کوہلی، جسپریت بمرا، ہاردک پانڈیا، رویندر جڈیجہ اور روہت شرما شامل ہیں۔

روہت شرما جنہوں نے ورلڈ کپ ٹورنمنٹ میں سب سے زیادہ رنز اسکور کئے ہیں جیسا کہ انہوں نے 648 رنز کے ساتھ پہلے مقام پر فائز رہنے کے علاوہ پانچ سنچریاں بھی اسکور کی ہیں لہٰذا سچن نے روہت شرما کو جانی بیروسٹو کے ساتھ اپنی ٹیم میں بحیثیت اوپنر شامل کیا ہے جبکہ نمبر 3 پر کین ولیمسن بحیثیت کپتان موجود ہیں۔

 دلچسپ حقیقت یہ بھی ہیکہ سچن نے نمبر چار پر ویراٹ کوہلی کو منتخب کیا ہے جبکہ ورلڈ کپ کے آغاز سے قبل ہندوستانی ٹیم کا سب سے بڑا مسئلہ نمبر چار پر پراعتماد بیٹسمین کو کھلانے کا تھا اور ورلڈ کپ کے دوران یہی مسئلہ ٹیم کیلئے تشویش کا باعث رہا۔ آل راونڈرس کی فہرست میں شکیب الحسن، بین اسٹوکس، ہاردک پانڈیا اور رویندر جڈیجہ بھی سچن کی ٹیم میں شامل رہے۔

ونڈے میں سب سے زیادہ رنز بنانے والے سچن نے اپنی ورلڈ ٹیم کے بولروں میں جسپریت بمرا کے ساتھ آسٹریلیا کے بائیں ہاتھ کے فاسٹ بولر مچل اسٹارک کو شامل کیا ہے جبکہ جوفرا آرچر تیسرے فاسٹ بولر بنے ہیں۔ سچن کی منتخب 11 رکنی ورلڈ کپ ٹیم ان کھلاڑیوں پر مشتمل ہیں۔ روہت شرما، جانی بیرسٹو (وکٹ کیپر)، کین ولیمسن (کپتان)، ویراٹ کوہلی، شکیب الحسن، بین اسٹوکس، ہاردک پانڈیا، رویندر جڈیجہ، مچل اسٹارک، جسپریت بمرا اور جوفرا آرچر۔