امراوتی: سینی ٹائزر کے پینے کے بعد تین افراد کی موت ہوگئی۔یہ واقعہ اے پی کے ضلع کڑپہ میں پیش آیا۔جمعہ کو ضلع پرکاشم کے کوریچیڑو اور پامورو مواضعات میں سینی ٹائزر کے استعمال کے بعد 13افراد کی موت ہوگئی تھی۔ان میں سے بیشتر بھکاری اور مزدور تھے۔دس افراد کی موت کوریچیڑو گاوں میں اور تین کی پامورو گاوں میں ہوئی تھی۔نئے معاملہ میں تین افراد کی موت ضلع کڑپہ کے پنلیمورو گاوں میں ہوئی۔ذرائع نے کہا کہ چونکہ شراب دستیاب نہیں تھی اسی لئے ان افراد نے گذشتہ ایک ہفتہ کے دوران ہاتھوں میں لگائے جانے والے سینی ٹائزرس کا استعمال نشہ کے لئے شروع کردیا تھا۔دو افراد جنہوں نے اس کا استعمال کیا تھا میں سے ایک کی موت موقع پر ہی ہوگئی۔
دوسرے کی موت رمس اسپتال میں علاج کے دوران ہوئی اور تیسرے شخص کی موت آج صبح اس کے گھر میں ہوئی۔پولیس نے سینی ٹائزرس کی خالی بوتلوں کو ضبط کیا اور ان کو معائنہ کے لئے لیب بھیج دیاگیا۔مقامی افراد نے نشاندہی کی کہ یہ افراد تقریبا ایک ہفتہ سے سینی ٹائرر کا استعمال کررہے تھے۔مقامی افرادنے پولیس کو اس بات کی اطلاع دی۔مرنے والوں کے ارکان خاندان نے کہا کہ یہ افراد نشہ کے عادی تھی اور چونکہ شراب ان کو گذشتہ چند ہفتوں سے آسانی سے دستیاب نہیں ہورہی تھی اسی لئے ان افراد نے سینی ٹائزرس کا استعمال شروع کردیا۔پولیس نے اس سلسلہ میں ایک معاملہ درج کرلیا اور جانچ شروع کردی۔اس تلگو ریاست کے مختلف مقامات پر سینی ٹائزرس آسانی کے ساتھ دستیاب ہیں تاہم بعض افراد نے نشہ کے لئے ان کو خریدنا شروع کردیا ہے۔مرنے والوں کی شناخت چنا کیشولو،بھیمیا اور اوبلیش کے طورپر کی گئی ہے۔اوبلیش کی موت رمس میں علاج کے دوران ہوئی۔بھیمیا کی موت اس کے گھر کے قریب ہوئی اور اس کی لاش پوسٹ مارٹم کے لئے رمس منتقل کی گئی۔
