دبئی ۔متحدہ عرب امارات کے شہر العین میں پریکٹیکل ٹیکنالوجی انسٹی ٹیوٹ کی طالبات نے موبائل فون چارج کرنے کے لیے مخصوص اسپورٹس جوتے تیار کر لیے ہیں۔ یہ جوتے چہل قدمی اور اسکیٹنگ میں بھی کام آ سکتے ہیں۔ ان کی مدد سے موبائل فون چارج ہو سکتا ہے۔ ان جوتوں سے متعدد کام لیے جا سکتے ہیں۔
تفصیلات کے مطابق یہ جوتے مفت توانائی فراہم کرنے میں مدد گار اور ماحول دوست ہوں گے۔ معمولی نجی گھریلو اشیا کو سستی توانائی فراہم کریں گے۔ خاص طور پر موبائل، کیمرے اور صوتی آلات کو ان کے ذریعے بجلی فراہم کی جا سکے گی۔
اماراتی طالبات نے اپنی نوعیت کے نئے طرز کے یہ جوتے طحنون کمپلیکس میں تیار کیے ہیں۔یہ منفرد اسپورٹس جوتے تیار کرنے والی ٹیم میں عائشہ جمعہ الکعبی، شمسہ ظافر الاحبابی اور میرة خلف المھیری شامل ہیں۔ ان کی یہ ایجاد العین بلدیہ کے خصوصی پروگرام میں پیش کی گئی۔ یہاں کی بلدیہ ہر ماہ اچھوتی ایجادات نمائش کے لیے رکھتی ہے۔
عائشہ الکعبی نے اس موقع پر کہا ہے کہ ہماری یہ ایجاد اماراتی مارکیٹ کے لیے اچھا تحفہ ہے۔ ہماری کوشش تھی کہ معاشرے کے مسائل کے حل میں طالبات اپنا حصہ کریں۔شمسہ الاحبابی نے کہا کہ تعلیم کے ذریعے ہمارا مقصد روزمرہ زندگی میں پیش آنے والے چیلنجوں کے حل پیش کرنا ہے۔ نت نئے افکار کو عملی جامہ پہنا کر یہ کام کیا جا سکتا ہے۔ یہی ہماری زندگی کا مشن ہے۔
