امراوتی: مرکز نے آج وائی ایس آرکانگریس کے رکن پارلیمنٹ رگھورام کرشنن راجو کی سیکوریٹی میں اضافہ کیا جو اے پی حکومت کے فیصلوں میں نقائص کی نشاندہی پر مسلسل خبروں میں ہیں۔انہیں جان سے مارنے کی دھمکیاں مل رہی ہیں جس کے بعد وہ مرکزی وزارت داخلہ سے رجوع ہوئے اور سیکوریٹی میں اضافہ کی خواہش کی۔ان کی اس درخواست پر مرکزی وزارت داخلہ نے ان کو وائی زمرہ کی سیکوریٹی فراہم کردی۔سمجھا جاتا ہے کہ رکن پارلیمنٹ نے حال ہی میں پولیس سے شکایت کرتے ہوئے کہا تھا کہ وائی ایس آرکانگریس پارٹی کے لیڈروں نے حلقہ میں آنے پر ان کو جان سے مارنے کی دھمکی دی تھی۔یہ کہتے ہوئے کہ ان کی جان کو خطرہ ہے. انہوں نے اسپیکر لوک سبھا اوم برلاکو مکتوب روانہ کرتے ہوئے کہا تھا کہ وہ عوامی مسائل کے حل کے لئے اپنے حلقہ میں جا نہیں پارہے ہیں۔
انہوں نے مرکزی دستوں کے ذریعہ سیکوریٹی فراہم کرنے کی خواہش کی تھی۔بعد ازاں انہوں نے وزیر دفاع راج ناتھ سنگھ سے بھی ملاقات کرتے ہوئے تحفظ فراہم کرنے پر زور دیا تھا۔انہوں نے مرکزی مملکتی وزیر داخلہ کشن ریڈی سے بھی ملاقات کی تاکہ سیکوریٹی کے مسائل پر تبادلہ خیال کیاجاسکے۔انہوں نے واضح کیا تھا کہ سیکوریٹی کی فراہمی پر ہی وہ اپنے حلقہ میں جائیں گے جس پر مرکزی وزارت داخلہ نے ان کو وائی زمرہ کی سیکوریٹی فراہم کی۔
