ڈھاکہ ۔بنگلہ دیش پولیس نے ملک کے دارالحکومت ڈھاکہ کے مشرقی علاقے کومیلہ کی ایک مسجد کی سیڑھیوں پر اپنی ساتھی کے ساتھ رقص کرنے والے نوجوان کو گرفتار کر لیا گیا ہے۔ نوجوان کو مسجد میں رقص کرنے، اس کا ویڈیو بنانے، اداکاری کرنے اور پھر اسے سوشل میڈیا پر شائع کرنے کے الزامات کا سامنا ہے۔
حکام نے کہا ہے کہ بنگلہ دیش میں سوشل میڈیا کی معروف شخصیت یاسین کو دیوی دوار کے پاس ان کے گھر سے گرفتار کیا گیا جس پر مسلمانوں کے مذہبی جذبات مجروح کرنے کا الزام ہے۔ اس کے خلاف ابھی باضابطہ مقدمہ دائر کرنے سے پہلے حراست میں رکھا گیا ہے اور اگر عدالت نے اسے قصوروار پایا تو اسے پانچ برس تک کی قید کی سزا ہو سکتی ہے۔
پولیس حکام کے بموجب مسجد کی سیڑھیوں پر رقص کرنے میں مذکورہ نوجوان کے ساتھ ہی ایک خاتون بھی شامل ہے اور دونوں نے مل کر ویڈیو بنایا تھا۔ پولیس نے کہا ہے کہ خاتون کی گرفتاری کے لیے ابھی اسے تلاش کیا جا رہا ہے۔بنگلہ دیش کی حکومت نے حال ہی میں جو پچاس نئی مساجد تعمیر کی ہیں انہیں میں سے ایک مسجد میں تقریباً ایک ماہ قبل یہ ویڈیو تیار کیا گیا تھا اور پھر اسے ویڈیو شیئرنگ ویب سائٹ لاکی پر شائع کیا گیا ۔
حکام کے مطابق اس سے پہلے کہ اس ویڈیو کو ویب سائٹ سے ہٹایا جا سکتا تقریبا ًایک ملین افراد نے اسے دیکھا۔ بنگلہ دیش ایک سیکولر ملک ہے تاہم حالیہ برسوں میں دیکھا یہ گیا ہے کہ حکام مذہب اسلام کے دفاع کے لیے سخت ہیں۔ گزشتہ برس ملک کے دو ہندو افراد کو ایک ایسی سوشل میڈیا پوسٹ کے لیے سات برس قید کی سزا سنائی گئی تھی جو حکام کی نظر میں پیغمبر اسلام کی شان میں توہین کے مترادف تھی۔
