میڈرڈ ۔ اسپین سے تعلق رکھنے والی ایک پاپ گلوکارہ اور ڈانسر اسٹیج پرمظاہرے کے دوران حادثے میں ہلاک ہوگئیں۔جوانا سینز نامی گلوکارہ اسپین میں اسٹیج پر اپنے میوزیکل گروپ سوپر ہالی ووڈ اورکسٹرا کے ساتھ پرمظاہرہ کررہی تھی، جبکہ اس موقع پر وہاں ہزاروں کی تعداد میں شائقین یہ پروگرام دیکھنے کے لیے موجود تھے۔
رپورٹ کے مطابق 30 سالہ جوانا اور ان کے 15 ساتھی اسٹیج پر موجود تھے جب زبردست آتش بازی کا مظاہرہ بھی کیا جارہا تھا۔اس موقع پر آتش بازی کے لیے استعمال ہونے والا ایک راکٹ گلوکارہ کے پیٹ میں جاکر لگا، جس کے باعث وہ شائقین کے سامنے مظاہرے کے دوران ہی اسٹیج پر گر پڑیں۔
رپورٹ کے مطابق یہ حادثہ رات 2 بجے پیش آیا، جوانا کے اسٹیج پر گرتے ہی مظاہرہ روک کر اسٹیج کے پردے بند کردیے گئے، جس کے بعد ہجوم میں موجود ایک ڈاکٹر نے انہیں ابتدائی طبی امداد فراہم کی۔بعدازاں جوانا کو فوری ہسپتال منتقل کیا گیا تاہم وہ جانبر نہ ہوسکیں۔ہجوم میں موجود عینی شاہدین نے کہا کہ بہت تیز دھماکے کی آواز آنے کے بعد انہوں نے گلوکارہ کو اسٹیج پر گرتے دیکھا۔جبکہ ایک شخص نے کہا کہ دو راکٹ نظر آئے، ایک تو صحیح سمت میں گیا جبکہ دوسرا گلوکارہ کے پیٹ میں جاکر لگا۔جوانا سینز گروپ کی مین ڈانسر اور کوریوگرافر تھیں۔اس میوزیکل گروپ میں 15 ارکان ز موجود تھے جن میں میوزیشن، ڈانسرز موجود ہیں۔
