نئی دہلی ۔ وزیراعظم نریندر مودی اور ان کی حکومت نے ہندوستان میں معیشت کو بستر مرگ پرپہنچادیا ہے اور اب بیروز گاری کی شرح تاریخ کی بلند ترین سطح پر پہنچ گئی ہے۔
آئی ایم ایف کی رپورٹ کے مطابق ہندوستان کی معیشت اس وقت تاریخ کی بدترین سست روی کا شکار ہے جس کی بحالی کے لیے وزیراعظم نریندر مودی کو فوری طور پر اقدامات کرنے ہوں گے۔
عالمی مالیاتی ادارے (آئی ایم ایف) کی سالانہ ریویو رپورٹ کے مطابق ہندوستان کی جی ڈی پی کی شرح مسلسل نیچے آرہی ہے، جو کہ کچھ عرصہ قبل تیز ترین رفتار کے ساتھ آگے بڑھ رہی تھی اور مودی حکومت میں غیر ملکی سرمایہ کاری بھی ر ±ک گئی ہے۔
آئی ایم ایف کی ایشیا اینڈ پیسفک کے رہنما رنیل نے فرانسیسی خبر رساں ادارے کو تفصیلات بتاتے ہوئے کہا ہے کہ ہندوستانی معیشت اس وقت سست روی کے درمیان میں ہے، جس کو بہتر کرنے کے لیے فوری طور پر اقدامات کرنے ہوں گے۔
آئی ایم ایف نے انتباہ دینے کے انداز میں کہا ہے کہ ہندوستانی حکومت کے پاس موجودہ قرض کی صورتحال اور سود کی ادائیگی کے پیش نظر ترقی کی حمایت میں اخراجات بڑھانے کے لئے محدود جگہ ہے۔
یاد رہے کہ اس سے قبل اکتوبر میں بھی آئی ایم ایف نے ہندوستان کی معاشی شرح نمو میں 1 فیصد کمی کی پیش قیاسی کی تھی۔ گزشتہ ماہ جاری کی جانے والی رپورٹ کے مطابق ہندوستانی معیشت کی شرح نمو 6 سال کی کم ترین سطح پر آگئی، جولائی تا ستمبر معاشی شرح نمو ساڑھے 4 فیصد رہی۔
رپورٹ کے مطابق گزشتہ سال جولائی تا ستمبر ہندوستانی معیشت کی شرح نمو 7 فیصد تھی، رواں سال اپریل سے جون 2019 میں ملک کی شرح نمو 5 فیصد تھی۔ اسی طرح ہندوستان میں بیروزگاری کی شرح بھی 40 سال کی بلند ترین سطح پر آگئی۔
آٹو سیکٹر میں بھی بے انتہا سست روی اور صارفین کی قوت خرید میں نمایاں کمی دیکھی گئی۔ معاشی ابتری کی وجہ سے لدھیانہ میں سائیکلوں اور آگرہ میں جوتے جیسی صنعتوں سے وابستہ غیر منظم شعبے بڑی تعداد میں بند ہو چکے ہیں۔
ہندوستانی ماہر معاشیات کے مطابق 3 برسوں میں ہندوستان میں بے روزگاری میں اضافہ ہوا ہے، ملک میں ملازمین کی تعداد 45 کروڑ تھی جو کم ہو کر 41 کروڑ رہ گئی ہے۔
