مودی کا طیارہ پاکستانی فضائی حدود سے نہیں گزرے گا

نئی دہلی ۔ شنگھائی تعاون تنظیم(ایس سی او)کے سربراہان مملکت کی چوٹی کانفرنس میں حصہ لینے کے لئے کرگیز جمہوریہ کے دارالحکومت بشکیک جانے کے لئے وزیراعظم نریندرمودی کا طیارہ پاکستان کے فضائی حدود سے ہوکر نہیں گزرے گا۔وزارت خارجہ کے ترجمان رویش کمار نے مودی کے طیارے کے راستے کے بارے میں میڈیا کے سوالوں کا جواب دیتے ہوئے کہا کہ حکومت نے بشکیک جانے کے لئے وزیراعظم کے طیارے کے لئے دو راستوں کے متبادل کو تلاش کیا تھا۔ انہوں نے کہا کہ یہ فیصلہ کیاگیا ہے کہ وزیراعظم کا طیارہ عمان ،ایران اور وسطی ایشیائی ممالک کے فضائی حدود سے گزرتا ہوا بشکیک پہنچے گا۔

اسلام آباد سے آئی میڈیا رپورٹ میں کہاگیا تھا کہ ہندوستان نے مودی کے طیارے کے بشکیک جانے کے لئے پاکستان حکومت سے اپنے فضائی حدود سے گزرنے کی اجازت طلب کی تھی۔ پہلے وزارت خارجہ کے عہدیداروں نے مودی کے طیارے کے راستے پر کئے گئے سوالات کو یہ کہتے ہوئے ٹال دیا تھا کہ وزیراعظم کی سلامتی کے پیش نظر سفرکا راستہ عام نہیں کیا جاسکتا۔

مودی 13اور 14جون کوشنگھائی تعاون تنظیم (ایس سی او)کے رکن ملکوں کے سربراہان مملکت کی چوٹی کانفرنس میں حصہ لینے کے لئے بشکیک روانہ ہوں گے جہان ان کی روس کے صدر ولادیمر پوتن اور چین کے صدر شی جنپنگ کے ساتھ دو طرفہ ملاقات بھی ہوگی۔ دونوں دن چوٹی کانفرنس میں حصہ لینے کے علاوہ ان کا کرگیز جمہوریہ میں دو روزہ دورے کا بھی پروگرام ہے ۔ بشکیک میں پاکستان کے وزیراعظم عمران خان کے ساتھ رسمی یا غیر رسمی ملاقات کے امکان کے بارے میں پوچھے جانے پر وزارت خارجہ نے واضح کیا کہ مودی کی پاکستانی وزیراعظم سے ملاقات کا کوئی پروگرام نہیں ہے ۔