نئی دہلی۔ ہندوستان میں گذشتہ 24 گھنٹوں کے دوران 3293 مریضوں کی موت ہوگئی جن میں سے سب سے زیادہ افراد کی جان مہاراشٹر ، دہلی اور اتر پردیش میں گئی۔اس دوران جہاں مہاراشٹر میں895 مریض کورونا سے موت کی نیند سوگئے ہیں وہیں381 افراد دہلی میں اور264 افراداتر پردیش میں مارے گئے ۔مرکزی وزارت صحت کی جانب سے صبح جاری کردہ اعداد و شمار کے مطابق گذشتہ 24 گھنٹوں کے دوران ملک میں 360960 نئے معاملے سامنے آنے کے ساتھ متاثرہ افراد کی تعداد بڑھ کر ایک کروڑ 79 لاکھ 97 ہزار267 ہوگئی ہے ۔ اس عرصے کے دوران 261162 مریض بھی صحتیاب ہوئے ہیں۔ اب تک ایک کروڑ48 لاکھ 17 ہزار 371 افراد ملک میں کورونا سے صحتیاب ہوئے ہیں۔
اس مدت کے دوران فعال معاملوں کی تعداد 2978709 ہوگئی ہے ۔ وہیں 3293 مریضوں کی موت کے ساتھ اس بیماری سے مرنے والوں کی تعداد بڑھ کر 201187 ہوگئی ہے ۔ ملک میں صحتیاب ہونے کی شرح 82.33 فیصد ہوگئی ہے اور فعال معاملوں کی شرح بڑھ کر 16.55 فیصد ہوگئی ہے جبکہ اموات کی شرح کم ہوکر 1.12 فیصد ہوگئی ہے ۔
ملک میں کورونا کا قہرتھمنے کا نام نہیں لے رہا ہے اور گزشتہ 24 گھنٹوں کے دوران کورونا کے 3.60 لاکھ سے زیادہ نئے معاملے سامنے آئے ہیں ، لیکن راحت کی بات یہ رہی کہ 2.61 لاکھ سے زائد افراد نے اس وبا کو شکست دی ، جبکہ تقریباََ 3300 افراد کی موت ہونے سے مرنے والوں کی تعداد دو لاکھ سے تجاوز کر گئی ہے ۔اس دوران ملک میں گذشتہ 24 گھنٹوں کے دوران 2556182 افراد کو کوروناکے ٹیکے لگائے گئے ۔ اس کے بعد اب تک ملک میں 14 کروڑ 78 لاکھ 27 ہزار 367 افراد کو ٹیکے لگائے جاچکے ہیں۔
مہاراشٹر کورونا کے فعال مریضوں کی سرفہرست ہے اور گذشتہ 24 گھنٹوں کے دوران ایکٹو کیسز میں 2،289 کی کمی واقع ہونے سے ان کی تعداد کم ہو کر 674358 رہ گئی ہے ۔ اس دوران ریاست میں مزید 67752 مریضوں کے صحتیاب ہونے سے کورونا کو شکست دینے والوں کی تعداد بڑھ کر 3669548 ہوگئی ہے جبکہ مزید 895 مریضوں کی موت ہونے سے مرنے والوں کی تعداد 66179 ہوگئی ہے ۔
