حیدرآباد۔22 مارچ : امیر پیٹ تا ہائی ٹیک سٹی حیدرآبادمیٹرو ریل کی خدمات کے آغاز کے دوسرے دن ہی حیدرآباد میٹرو ریل لمیٹڈ نے اسٹیشن سے دفاتر اور گھروں تک مسافرین کو پہنچانے کے لئے ای آٹوز متعارف کرنے کا اعلان کیا ہے ۔ حیدر آباد میں میٹروریل کی خدمات کے آغاز کے بعد یہ مسئلہ بھی دیکھا گیا ہے کہ ریلوے اسٹیشن سے دفاتر یا مکانات تک مسافرین کے لئے رسائی کا بہتر انتظام نہیں ہے جس کے لئے ارباب مجاز نے اسٹیشن سے دوسری منزل تک پہنچانے کے لئے ای بائکس ، روایتی بائکس اور کار یں فراہم کی ہیں لیکن کئی اسٹیشنز پر ابھی بھی آخری منزل تک عوام کو پہنچانے کے لئے دیگر سہولیات دستیاب نہیں ہیں۔
ای آٹوز فراہم کرنے کے اعلان کے بعد جو تفصیلات جاری کی گئی ہیں اس میں دس اسٹیشنوں پر ای آٹوز فراہم کیے جائیں گے اور ان اسٹیشنوں میں جے این ٹی یو کالج کوکٹ پلی ہاؤزسنگ بورڈ ، ایرا گڈہ ، سری نگر، دلسکھ نگر وکٹوریا میموریل ، حبشی گوڑہ ، خیریت آباد، درگم چیرو اور ہائی ٹیک سٹی قابل ذکر ہیں۔ ای آٹوز ماحولیات دوست ہوں گے اور یہ مختلف ایجنسیوں کی جانب سے اپنی خدمات فراہم کریں گے۔ ابتدائی مرحلے میں چند اسٹیشنز پر ای آٹوز فراہم کئے جائیں گے جس کے بعد ان کی دائرے کارکردگی میں مزید اضافہ کیا جائے گا ۔
ای آٹوز سے خدمات فراہم کرنے کا اصل مقصد اسٹیشن سے دفاتر اور مکان تک مسافرین کو آرام دہ سواری فراہم کرنا ہے ۔ یہ آٹوز تین نشستیں یا پانچ نشستوں والے ہوںگے اور ان آٹوز میں جی پی ایس سسٹم بھی رہے گا جس سے مسافرین کو یہ اطمینان ہوگا کہ وہ جس آٹو میں سفر کررہے ہیں اس کی نگہداشت کی جا رہی ہے ۔ علاوہ ازیں ان آٹوز کو چلانے والے ڈرائیورز کے لئے مخصوص یونیفارم بھی فراہم کیا جائے گا ۔ ای آٹوز میں ہیلپ لائن بھی دستیاب رہے گی جس کے ذریعے مسافرین اپنی شکایات درج کرنے کے علاوہ مدد بھی حاصل کر سکیں گے ۔
ہیلپ لائن فراہم کرنے کا ایک اور مقصد یہ ہے کہ آٹو ڈرائیورز کے مسافرین کے ساتھ برتاو ¿ کو دوستانہ بنانا ہے ۔ ہیلپ لائن کے ذریعہ مسافرین آٹو ڈرائیورز کی جانب سے زیادہ کرایہ، بدتمیزی اور دیگر شکایات کو بھی درج کروا سکیں گے ۔ ای آٹوز کی خدمات فراہم کرنے کے لئے ایجنسیز کے لئے جو تفصیلات فراہم کی گئی ہیں ان میں سب سے پہلے تو اس ایجنسی کو ترجیح دی جائے گی جو فی کلومیٹر سب سے کم کرایہ وصول کرے گی اور ساتھ ہی ساتھ الیکٹرسٹی چارجنگ اور دیگر ضروری انفراسٹرکچر کو فراہم کرنے کی طمانیت دے۔
