ایمسٹرڈم ۔ نیدرلینڈ شہری نے تین سال میں 33 ممالک کا سفر اپنی بلیو بینڈٹ نامی برقیکار پر مکمل کر لیا۔ ویبے واکر نے ہالینڈ سے آسٹریلیا تک کا طویل سفر عوام کی برقی کاروں کے بارے میں رائے تبدیل کرنے کے لئے کیا ہے۔
ڈچ شہری ویبے واکر نے بجلی پر چلنے والی گاڑی میں 95 ہزارکلومیٹر کا سفر آسٹریلیا کے شہر سڈنی میں مکمل کیا۔ واکر امید کرتے ہیں کہ ان کے اس عمل سے عوام میں الیکٹرک گاڑیوں کی اہمیت اجاگر ہو گی۔ویبے واکر اپنی دی بلیو بینڈٹ برقی کار کے ذریعہ ترکی، ایران، ہندوستان، میانمار، ملائیشیا اور انڈونیشیا کے راستے آسٹریلیا کے مشرقی شہر سڈنی پہنچے۔ انہوں نے تین برس کے عرصے میں تقریباً 95 ہزارکلومیٹر کا سفر مکمل کر لیا۔
واکر نے تین برس قبل ہالینڈ سے اس سفر کا آغاز کیا تھا۔ دنیا بھر سے لوگوں نے ان کی مالی مدد کی، جس کے ذریعہ وہ اپنی رہائش، خوراک اورگاڑی کی بیٹری چارج کرنے کی قیمت ادا کرتے رہے ہیں۔واکر نے کہا کہ میں لوگوں کی رائے بدلنا چاہتا تھا تاکہ نقل و حرکت کے اس پائیدار ذریعے کے فوائد دیکھ کر لوگ متاثر ہوں اور برقی گاڑیوں کا زیادہ سے زیادہ استعمال کریں۔ واکر نے مزیدکہا ہے کہ اگر ایک شخص دنیا کے ایک حصے سے دوسری حصے تک برقی گاڑی میں سفر کر سکتا ہے تو روز مرہ کے استعمال کے لئے بھی یہ یقیناً فائدہ مند ثابت ہوسکتی ہیں۔
واکر کی الیکٹرک کار دی بلیو بینڈٹ ایک مرتبہ چارجنگ کے بعد دو سوکلومیٹر تک کا سفر طے کر سکتی ہے۔ ان کے مطابق اگر یہ طویل سفر پٹرول یا ڈیزل سے چلنے والی گاڑی پر کیا جاتا تو 6785 لیٹر ایندھن استعمال ہوسکتا تھا۔امریکی ماحولیاتی تحفظ کی ایجنسی کے اعداد و شمار کے مطابق ڈیزل یا گیس سے چلنے والی کار سالانہ 4.6 میٹرک ٹن کاربن ڈائی آکسائیڈ گیس خارج کرتی ہے جو ماحولیات کے لئے انتہائی نقصاندہ ہے۔
