نئی دہلی۔ کورونا وائرس کا سامنا کر رہے چین کے شہر ووہان سے 32 غیر ملکی شہریوں سمیت 112 ہندوستانی شہریوں کو لے کر ایر فورس طیارہ دہلی پہنچا۔حکومت نے خوفناک وبا سے پریشان چین کے لوگوں کی مدد کے لئے 15 ٹن طبی اور امدادی سامان لے کر ہندوستانی فضائیہ کاطیارہ سی17 کو گزشتہ شام ووہان روانہ تھا اور یہ طیارہ آج مجموعی طور پر112 مسافروں کو لے کر دہلی کے اندرا گاندھی ایر پورٹ پہنچا۔
قابل ذکر ہے کہ وزیر اعظم نریندر مودی نے8 فروری کو چین کے صدر شی جن پنگ کو خط لکھ کر کورونا وائرس سے نمٹنے کی کوششوں میں یکجہتی کا اظہار کیا تھا اور چین کی ضرورتوں کے مطابق ہندوستان کی جانب سے ہر ممکن مدد کی پیشکش کی تھی۔ طبی سامان کی فراہمی سے چین کو اس وبا کے پھیلاؤکو روکنے میں مدد ملے گی جسے عالمی ادارہ صحت کی طرف سے عالمی صحت ایمرجنسی قرار دیا گیا ہے ۔
وزارت خارجہ کے مطابق ہندوستان اور چین کے درمیان سفارتی تعلقات کے قیام کی 70 ویں سالگرہ کے موقع پر یہ ا مداد چین کے لوگوں کے تئیں ہندوستان کے لوگوں سے دوستی اور یکجہتی کی علامت ہے ۔
اس طیارہ کے ذریعہ ووہان میں ہندوستانی سفارت خانے کے تین عہدیداروں سمیت 76 ہندوستانیوں اور36 بیرون ملک شہریوں کو یہاں لایاگیا ہے ۔ ان تمام غیر ملکی شہریوں کو حکومت کی پڑوسی ممالک کو اہمیت دینے والی پالیسی کے تحت یہاں لایا گیا ہے ۔ ان میں بنگلہ دیش کے 23، چین کے 6، میانمار اورمالدیپ کے دو دو اورامریکہ اور جنوبی افریقہ کا ایک ایک شہری شامل ہے۔
ووہان میں پھنسے ہندوستانیوں کو نکالنے کے لئے حکومت کی طرف سے بھیجی گئی یہ تیسری پرواز تھی۔ اس سے پہلے دو پروازیں31 جنوری اور یکم فروری کو ہوئی تھی جن میں 723 ہندوستانیوں اور43 غیر ملکی شہریوں کو لایا گیا تھا۔
چین میں اس مہلک وائرس سے اب تک 2715 افراد ہلاک ہو چکے ہیں ، جبکہ 78000 افراد اب بھی سے اسے متاثر ہیں ۔ وہیں 29700 لوگوں کے علاج کے بعد دواخانوں سے چھٹی دی جا چکی ہے ۔ موجودہ وقت میں یہ وائرس دنیا کے37 ممالک میں پھیل چکا ہے ۔
