سری نگر۔ محکمہ موسمیات نے خشک مگر ابرآلود موسم کے درمیان منگل سے وادی کشمیر میں بارشوں کا ایک اور مرحلہ شروع ہونے کی پیش قیاسی کردی گئی ہے۔دوسری جانب جموں میں پیر کی صبح سے ہی موسلا دھار بارشوں کا سلسلہ شروع ہوا جس سے جہاں سڑکیں زیرآب ہو گئیں وہیں پانی مکانوں میں بھی داخل ہوگیا ہے ۔متعلقہ محکمے کے ایک ترجمان کے مطابق اگلے چوبیس گھنٹوں کے دوران جموں و کشمیر کے خطہ کشمیر میں کہیں کہیں گرج چمک کے ساتھ ہلکے درجے کی بارشیں ہوسکتی ہیں جبکہ صوبہ جموں میں درمیانی درجے کی بارشیں ہونے کا امکان ہے ۔
انہوں نے کہا کہ جموں وکشمیر میں 27 سے 30 جولائی تک موسلا دھار بارشیں متوقع ہیں۔انہوں نے مزید کہا ہے کہ جموں صوبے کے بالائی علاقوں میں بارشوں کے باعث سیلابی ریلے اور مٹی کے تودے گر سکتے ہیں۔دریں اثنا وادی کشمیر میں جہاں پیر کے روز موسم خشک مگر ابر آلود رہا وہیں جموں میں صبح سے ہی موسلادھار بارشیں ہوئیں جس سے سڑکوں پر پانی جمع ہو گیا۔موصولہ اطلاعات کے مطابق جموں کی سڑکوں پر جمع پانی سے جہاں پیدل سفر کرنے والوں کو مشکلات ہورہی ہیں وہیں گاڑیاں بھی بمشکل ہی چل پا رہی ہیں۔
جموں شہر کے پائین علاقوں بشمول بھگوتی نگر، تالاب تلو، جیول چوک، راجیندر نگر، قاسم نگر، وینائک بازار، ڈوگری چوک، گاندھی نگر، سینک کالونی، گرین بلٹ وغیرہ میں پانی مکانوں میں بھی گھس آیا جس سے مکینوں کو مشکلات سے دوچار ہونا پڑا۔پولیس ذرائع کے بموجب کہ ضلع ریاسی کی ترکوٹہ پہاڑیوں جہاں شری ماتا ویشنو دیوی مندر واقع ہے یہاں گہری دھند کی وجہ سے ہیلی کاپٹر خدمات متاثر ہو گئیں۔انہوں نے کہا کہ تمام دریاؤں بشمول دریائے توی میں پانی کی سطح بڑھ رہی ہے تاہم بارشوں سے کسی جانی یا مالی نقصان کی فی الوقت کوئی اطلاع موصول نہیں ہوئی ہے ۔پولیس نے ناساز موسمی حالات کے پیش نظر عوام سے سری نگر جموں قومی شاہراہ پر سفر کرنے سے احتیاط کرنے کی تاکید کی ہے ۔
