نئی دہلی۔ ہندوستانی کرکٹ کنٹرول بورڈ (بی سی سی آئی) نے انگلینڈ دورے پر جانے والے کھلاڑیوں کو سخت ہدایت دیتے ہوئے کہا کہ اگر کوئی کھلاڑی کورونا سے متاثر ہوتا ہے تو اس کو ٹیم سے باہر کردیا جائے گا۔ ٹیم کے فیزیو یوگیش پرمار نے کھلاڑیوں کو سخت ہدایت دیتے ہوئے کہا کہ ممبئی میں قرنطینہ ہونے سے پہلے سبھی کھلاڑی احتیاط برتیں اور اپنے آپ کو الگ تھلگ رکھیں۔ ہندوستانی ٹیم 19 مئی سے ممبئی کے بایو ببل میں داخل ہوسکتی ہے اور اس کے بعد انگلینڈ پہنچ کر ٹیم کو دس روز قرنطینہ میں رہنا ہوگا۔
بایو۔ببل میں داخلے کے بعد ہندوستانی کھلاڑی، معاون عملہ اور ان کے خاندان کے افراد کی پہلے روز ہی کورونا جانچ ہوگی۔ اس کے ساتھ ہی بی سی سی آئی کھلاڑیوں کے لئے ایک خاص بایو ببل تیارکرنا چاہتا ہے ۔ ایسا اس لئے کیونکہ دورہ پرجارہے 20 کھلاڑی ملک کی مختلف ریاستوں سے ہیں اورکورونا کے معاملے پر سبھی ریاستوں کے حالات مختلف ہیں۔بی سی سی آئی کے عہدیدار کے مطابق بورڈکھلاڑیوں کو ہدایت دے چکا ہے اور کہا ہے کہ کورونا سے متاثر ہونے پر انہیں ٹیم سے باہر کردیا جائے گا لہذا وہ سخت احتیاط برتیں ۔ کھلاڑیوں سے یہ بھی کہا گیا ہے کہ ممبئی میں کورونا سے متاثر ہونے کسی بھی کھلاڑی کے لئے الگ سے چارٹرڈ فلائٹ کا بندوبست نہیں کیا جائے گا۔
عہدیدار کے مطابق کھلاڑیوں کے ساتھ ان کے افراد خاندان کی بھی جانچ کی جائے گی۔ ممبئی سے انگلینڈ روانہ ہونے سے پہلے کھلاڑیوں کو دو منفی ٹسٹ لانے ہوں گے ۔ اس سے یہ پتہ کرنے کی کوشش کریں گے کہ بایو ببل میں بغیر وائرس کے کھلاڑی آئے ہیں۔ بورڈ نے کھلاڑیوں سے خانگیکار اور ہوائی جہاز سے سفر کرنے کی ہدایت دی ہے ۔
