ریاض ۔ سعودی عرب نے بھی اپنی تیل کی تنصیبات پر حملوں کا ذمہ دار ایران کو قرار دیتے ہوئے کہا ہے کہ ابتدائی تحقیقات سے پتہ چلا ہے کہ تیل تنصیبات پر حملوں میں ایرانی ہتھیار استعمال کیے گئے۔سعودی عرب کی فوج کے ترجمان کرنل ترکی المالکی نے ریاض میں میڈیا سے گفتگو کرتے ہوئے کہا کہ ایران کے حمایت یافتہ حوثی باغیوں کی جانب سے حملے کی ذمہ داری قبول کی گئی لیکن حقائق اس دعوے کے برعکس ہیں کیونکہ ہفتے کی صبح کیے گئے یہ حملے یمن سے نہیں ہوئے تھے۔انہوں نے کہا کہ ابتدائی تحقیقات سے یہی معلوم ہوتا ہے کہ ان حملوں میں ایرانی ہتھیار استعمال کیے گئے لیکن انہوں نے معاملے کی مزید تفصیلات فراہم نہیں کیں اور کہا کہ تحقیقات مکمل ہونے پر معاملے کو عوام کے سامنے لے آئیں گے۔انہوں نے کہا کہ ہم ابھی تحقیقات کر رہے ہیں اور یہ جاننے کی کوشش کر رہے ہیں کہ یہ حملے کہاں سے کئے گئے۔
دوسری جانب ایران نے ایک مرتبہ پھر اپنے سابق موقف کو دہراتے ہوئے کہا کہ ان کا سعودی عرب کی تیل کی تنصیبات پر حملوں میں کوئی کردار نہیں۔ایران کی وزارت خارجہ کے ترجمان عباس موسوی نے کہا کہ ہم ایران پر لگائے گئے حملوں کے الزامات کی سختی سے مذمت کرتے ہیں، یہ الزامات ناقابل قبول اور بے بنیاد ہیں۔دوسری جانب سے حوثی باغیوں نے سعودی عرب میں تیل کی مزید تنصیبات کو نشانہ بنانے کی دھمکی دیتے ہوئے وہاں کام کرنے والی غیر ملکی کمپنیوں سے کہا ہے کہ وہ سعودی عرب میں موجود توانائی کی تنصیبات سے دور رہیں۔
حوثی باغیوں کے ترجمان یحییٰ سیری نے کہا کہ جس طرح ہفتے کو تیل کی تنصیبات کو نشانہ بنایا گیا، اسی طرح دوبارہ کسی بھی وقت تنصیبات کو نشانہ بنا سکتے ہیں۔14 ستمبر کو سعودی عرب میں حکومت کے زیر انتظام چلنے والی دنیا کی سب سے بڑی تیل کمپنی آرامکو کے 2 پلانٹس پر ڈرون حملے کیے گئے تھے۔امریکی سیکریٹری آف اسٹیٹ مائیک پومپیو نے الزام عائد کیا تھا کہ سعودی تیل کمپنی آرامکو کی آئل فیلڈ پر حملے میں ایران براہ راست ملوث ہے تاہم ایران نے ان الزامات کو مسترد کردیا تھا۔
امریکی صدر نے بھی ان حملوں پر برہمی کا اظہار کرتے ہوئے کہا کہ سعودی عرب کی تیل تنصیبات پر حملہ ہوا ہے، امریکہ ذمہ داران کو جانتا ہے اور اس کے پاس اس کا جواز بھی موجود ہے۔امریکہ نے تصدیق کی بنیاد پر اہداف بنالئے ہیں اور وہ بالکل تیار ہے۔تاہم اس سے قبل ایرانی صدر حسن روحانی نے امریکہ کو خبردار کیا کہ خطے میں امریکی مراکز اور طیارے ان کے میزائلوں کے نشانے پر ہیں۔یاد رہے کہ سعودی عرب کی تیل کی دو بڑی تنصیبات پر حملے سے دنیا کا سب سے بڑا تیل کا بحران پیدا ہوچکا ہے اور عالمی سطح پر تیل کی قیمتوں میں تقریباً 20فیصد تک اضافہ ہوا ہے۔اس حملے کے نتیجے میں سعودی آرامکو سے روزانہ 5.7ملین بیرل کی ترسیل متاثر ہوئی ہے جو عالمی سطح پر تیل کی پیداوار کا 5فیصد سے زائد حصہ ہے۔
