چینائی۔ تمل ناڈو حکومت نے یکم جنوری سے کووڈ19 کے خلاف نئی پابندیاں عائد کی ہیں۔ چیف منسٹر کے دفتر نے ایک بیان میں کہا کہ آٹھویں جماعت تک کے طلباء کے لیے 10 جنوری تک کلاسز کے لئے اسکول آنے کی اجازت نہیں ہو گی۔ تجارتی اداروں کو گنجائش کے صرف 50 فیصد تک داخلے کی اجازت ہوگی اور شادی کی تقریبات کے لیے صرف 100 لوگوں کو اجازت ہوگی۔ جنازوں میں حاضری 50 تک محدود رہے گی۔ ہر قسم کی نمائشیں ملتوی کر دی جائیں گی اور سماجی، ثقافتی اور سیاسی اجتماعات پر پابندی ہوگی۔
چیف منسٹر نے بیان میں کہا کہ ریستوراں میں کھانے کی خدمات 50 فیصد کی گنجائش کے ساتھ دی جائیں گی۔ بیان میں کہا گیا ہے کہ ہاسٹل، لاجز، جم صرف 50 فیصد صارفین کے ساتھ کام کر سکتے ہیں۔ محکمہ صحت عامہ نے ایک بیان میں کہا کہ تمل ناڈو میں اب 120 اومیکرون مریض رپورٹ ہوئے ہیں۔ وزیر صحت ما سبرامنیم نے میڈیا سے بات کرتے ہوئے کہا تازہ 74 اومیکرون مریضوں میں سے 63 چنگلپٹو میں، ایک ایک کنیا کماری، کوئمبٹور، پڈوکوٹائی، تنجاور، ترووالور، تریچی اور رانی پیٹ ریاست کے اضلاع میں ہیں۔ صورتحال کی قریب سے نگرانی کر رہے ہیں اور چیف منسٹر وقتاً فوقتاً جائزہ لے رہے ہیں اور اگر مزید پابندیوں کی ضرورت ہے تو ہمیں ان پر عمل درآمد کرنا ہو گا۔
مرکزی محکمہ صحت بھی ریاستی صحت کے حکام سے رابطے میں ہے اور میں نے پہلے ہی مرکزی وزیر صحت سے بات کر لی ہے۔ اور اسے ریاست کی صورتحال سے آگاہ کیا۔گریٹر چینائی کارپوریشن اس بیماری کے پھیلاؤ کو روکنے کے لیے اسکولوں اور کالجوں کے طلباء کے معاملوں کی جلد پتہ لگانے کے لیے زیادہ سے زیادہ ٹسٹ کروائے گی۔ تمل ناڈو اسٹیٹ پبلک ہیلتھ ڈپارٹمنٹ کے ایک سینئر عہدیدار نے کہا کہ اومی کرون کا کمیونٹی پھیلاؤ پہلے سے ہی جاری ہے اور اس پر قابو پانے کے لیے مناسب اقدامات کرنے کی ضرورت ہے۔
