پٹنہ۔ بہار کے وزیر اعلی نتیش کماربال بال بچ گئے کیونکہ منگل کو نالندہ ضلع میں ان کے جن سمواد پروگرام میں ایک معمولی دھماکہ ہوا اور دھماکے کا کچھ ملبہ چند فٹ کے فاصلے پر گرگیا جہاں نیتیش کمار تھے۔تین ہفتوں میں نتیش کمار پر یہ دوسرا حملہ تھا۔ اس سے پہلے ایک شخص نے 27 مارچ کو پٹنہ ضلع کے بختیار پورقصبے میں نتیش کمار کو پیچھے سے گھونسا مارا تھا۔
وزیر اعلیٰ نے منگل کو اس پروگرام کے لیے نالندہ کا سفرکیا، جس کا اہتمام ضلع انتظامیہ نے سلو بلاک کے گاندھی ہائی اسکول میں کیا تھا۔ یہ دھماکہ نتیش کمار سے تقریباً 20 فٹ دور ہوا جو عام لوگوں سے بات چیت میں مصروف تھے اور کچھ دھماکہ خیز مواد نتیش کمار سے صرف 5 فٹ کے فاصلے پرگرا، جس سے خیمہ میں افراتفری پھیل گئی۔نالندہ پولس کے ایک عہدیدار نے بتایا کہ اسلام پور پولیس اسٹیشن کے تحت ستیار گنج گاؤں کے رہنے والے سبھم آدتیہ نامی شخص کو اس سلسلے میں گرفتار کیا گیا ہے۔
ملزم نتیش کمار کا استقبال کرنے کی کوشش کررہا تھا لیکن وزیر اعلیٰ اس سے دور ہوگئے۔ جلد ہی دھماکہ ہوگیا۔ ہم نے اس کے قبضے سے ایک کریکر، ایک ماچس کا ڈبہ اور ایک چابی کی انگوٹھی برآمد کی ہے۔ ملزم کو اب گرفتار کرلیا گیا ہے اور اس سے پوچھ گچھ جاری ہے۔ سلو پولیس اسٹیشن کے ایک عہدیدار نے کہا۔
بختیار پور حملے کے بعد بہار پولیس نے وزیر اعلیٰ کی سیکورٹی بڑھانے کے لیے ایک بلیو پرنٹ تیار کیا تھا۔اے ڈی جی پی سیکورٹی بچو سنگھ مینا نے ہر ضلع مجسٹریٹ اور پولیس سپرنٹنڈنٹ کو ہدایات جاری کی ہیں کہ جب بھی وزیر اعلیٰ اپنے ضلع کا دورہ کریں تو وسیع انتظامات کریں۔ہدایت کے مطابق ضلع انتظامیہ کو 1991 کی ورما کمیٹی کی سفارش کے مطابق سیکورٹی فراہم کرنی ہوگی، جس نے مرکزی حکومت کو پیش کی گئی اپنی رپورٹ میں خصوصی سیکورٹی پیمانوں کی نشاندہی کی تھی۔
اس کے تحت وزیر اعلیٰ کے دورہ کے دوران سیکورٹی میں کسی بھی قسم کی کوتاہی پر عہدیداروں کو جوابدہ ٹھہرایا جائے گا۔ عہدیداروں کو دورے سے قبل مناسب حفاظتی اقدامات کرنے ہوں گے اور اس بات کو یقینی بنانا ہوگا کہ ناپسندیدہ لوگ یا اجنبی افراد وزیراعلیٰ کے قریب نہ آئیں۔ایسی سفارش کے باوجود نالندہ میں سیکورٹی کی سنگین خلاف ورزی ہوئی۔
